Kham lah ban im ka jaitbynriew, ia ka roi ka par: MDC Jaiaw

Shillong, 1 Nailar:
U MDC ka Jaiaw u Bah Adelbert Nong rum u la ong ba ka roi ka par ka wan hadien ban ia ka jaitbynriew. Haba kren ha ka rally kaba la pynlong hynne ban pyr shah ia ka jing knieh jaka ka sorkar na ki paid bah ban thaw ia ka New Shillong, ha madan Malki, u Bah Adelbert u la ong, “ngim donkam ia ka roi ka par haba ka jaitbynriew ka don ha ka jing ma”,. U la pyn rem jur ia ki MDC ka KHADC kiba la kren thiang ha ka por elekshon hynrei mynta kim nud sham ei ei pyrshah ia ka sorkar haba ka la pynkhein ia ka hok jong ki paidbah. “Nga buh jingkylli ia ki MDC, ba ki dei ki riew shet shukor”, la ong u Bah Adelbert.
U la byrthen jur ia kane ka sorkar kaba la nud ban wan thombor ia ka hok jong ki paidbah da kaba ong, “kano kano ka sorkar kaba thombor ia ki paidbah, kam dei ban ioh jaka,ngi dei ban pynkhyl lem noh ia kata ka sorkar”.
U la ong ba ka jing kam ka sorkar ban wanrah ia ka roi ka par ha katei ka New Shillong ka dei tang ka buit ban ai jaka ia ki dkhar ban wan shong ha kane ka ri Khasi. “Ka sorkar kaba leh da ka bor ym dei ban shah, dei ki paidbah ba shna ia ka sorkar bad ki don ka hok ban pynkyllem noh ia ka”,la ong u MDC ka KHNAM.
U la kyrshan tyngeh ruh ban pyntreikam noh ia ka Inner Line Permit ha kane ka jylla khnang ban tehlakam ia ka jingwan ki mynder sha kane ka ri.