Ka konstitwensi ki Congress lah dep lut: Witting halor ka Sub-Division

Shillong, 12 Rymphang:
Shen ha ka 15 tarik u rymphang u myntri rangbah ka jylla u Dr.Mukul Sangma un leit ban plie paidbah ia ka Civil Sub-Division-Pynursla bad u la dep plie ruh katto katne tylli ki Block kum ka Sohiong C&RD Block.
Ka Mawshynrut ka dei kawei na ka konstitwensi kaba ka sorkar ka la pynbna ban ai Civil Sub-Division hynrei haduh mynta ym shym la ioh jingtip eiei lano ka sorkar kan plie ia katei ka Civil-Sub-Division. Haba ia kren bad u MLA ka Mawshynrut u bah Witting Mawsor u la ong ba baroh kiba ka sorkar ka la pynbna ;la dep ban plie lut bad ia ka Pynursla ruh yn plie noh shen hynrei ym pat ioh jingtip pat lano yn plie ia ka Mawshynrut. “Baroh ki konstitwensi ki Congress la dep ban plie lut, sa tang ka jong nga ka Mawshynrut bad ka Mawlai, ki bym dei Congress, ngam tip shuh lano kin leh haduh mynta ngam pat bna khubor eiei” ong u bah Witting haba ia kren bad u Rupang.
Shuh shuh u la ong ba ia ka C&RD Block ha Sohiong la plie, ha Bhoirymbong la plie, ha Pynursla yn sa plie noh shen bad kiba bun ha ri Lum Garo la dep lut, “Nga la leit ia kren bunsien ia u myntri rangbah u Dr.Mukul Sangma hynrei u ong beit ba un sa buh tarik ynda u la leit, bun ki paidbah ki la kylli shi kylli ia nga lano yn plie noh” ong biang u bah Witting Mawsor MLA ka HSPDP na Mawshynrut.
Haba ia kren pat bad u MLA ka UDP na Mawlai u bah Embhah Syiemlieh halor ka Mawlai C&RD Block u la ong ba lashai ka sngi un leit ban pan por ban ioh ia kynduh ia u myntri rangbah ban pan jingshai bad ban kyrpad ia u ban plie noh kham kloi ia ka C&RD Block Mawlai, “Ngan pan por ban ia kynduh lashai” u la ong.