Pyrshah ka KHNAM ia ka lynti rel sha Shillong

Shillong, 12 Rymphang:
Ka Khun Hynniew-trep National Awakening Movement (KHNAM), ha ka kyrwoh jongka mynta ka sngi, ka iai pynpaw ia ka jingpyrshah jongka, halor ka jingthmu ban wan rah lynti rel sha Shillong.
Ka kyrwoh jong ka seng, ka shim ba ka jingkren jong u Dr Mukul Sangma ba ka lynti rel kan pynkiew ia ka kam shang pyrthei ha ka jylla ka long kaba ka seng kam lah ban pdiang bad ka dei tang ka buit ban ialam bakla ia u paidbah ka jylla.
Ka kyrwoh na ka KHNAM, ka ong ba ka Gangtok, Sikkim ka jngai haduh 125 km na ka kad rel ha New Jalpaiguri bad 114 Km na ka kad rel ha Siliguri. Ka Darjeeling ka jngai haduh 62 km na ka kad rel ha New Jalpaiguri bad ka dei ka Toy Train kaba shimpor haduh 7 kynta ban poi. Ladakh ka jngai haduh 700 km na ka kad rel ha Jammu, 434 Km na ka kad rel ha Srinagar bad 494 km na ka kad rel ha Manali. Ka Munnar, Kerela ka jngai haduh 110 km na ka kad rel ha Aluva Railway Station, 130 km na ka kad rel ha Ernakulam bad 135 km na ka kad rel ha Madurai.
Ka Shillong ka don ka jingjngai kaba duna ia ka 100 km na Guwahati Railway station bad ka shim por tang 2 kynta tam ban pyndep. Bun na ki surok ba poi sha ki jaka shang pyrthei, kiba don ha ka jylla ki long kiba sniew bha bad lada u Mukul u kwah ban kyntiew ia ki kam jngoh kai pyrthei, u dei ba pynthikna shwa ba ki surok ki ba pyniasoh bad ki jaka jngoh kai haka jylla kin long kiba bha, ong ka kyrwh jong ka seng.
“Ka seng kan iai pyrshah ia ka lynti rel namar haduh mynta ngim iohi ia kita ki Mechanism ban khanglad ia ka jingrung kyrthep ki mynder sha ka jylla”, pynkut ka kyrwoh U bah Thomas Passah, President, KHNAM State Youth Wing.