Sngewnguh ka HNPF ia ki paidbah

Jowai, 1 Nailar:
Ka seng HNPF, ka pynpaw ia ka jingsngew nguh kaba khraw shi katdei eh bad ai khublei kyrpang ia baroh ki paidbah jong ki ar tylli ki District kiba la kyrshan lang ia ka prokram iakhih jong katei ka seng, ha kine ki ar miet lynter naduh ka 30 bad 31 tarik u Naitung, halor ki jingdawa jong ka seng, ban pynkynriah kam ia ki ar ngut ki heh Pulit kiba la palat ka por treikam jong ki, kiba don ha East Jaintia Hills District.
Ka seng ka kyntu ia ka sorkar ba ka dei ban pyntreikam ia ki rukom buh kyndon jong ka na ka bynta ki ophisar sorkar la ka dei ia ki heh Pulit ne ia ki ophisar ba trei ha kiwei pat ki Department, ba ki dei ban don ha kano kano ka jaka ba ki trei tang hapoh 2 snem. Khamtam ka seng ka ban jur ia ka myntri kam poh iing, ka kong Roshan Warjri ba ka dei ban pynkynriah kam noh mardor ia ki ar ngut ki heh Pulit u ma W. Muksor bad u ma W. Rymbai kiba la don ha East Jaintia palat ia ka por ba la buh bad lada ka sorkar kam pynsngap ia kane hapoh kine ki khyndiat sngi ka seng kan pynlong biang ia ki prokram iakhih kiba kham tyngeh shuh shuh.