Yn shongthait U President bad Secretary ka KSU

Shillong, 9 Rymphang:
U President barim ka KSU u samla Daniel Khyriem bad u General Secretary barim katei ka seng u samla Auguster Jyrwa kin shongthait na ka kam nongialam jong katei ka sengbhalang ha ri Lum Khasi Jaintia. Shen ia ka kam nongialam kum u President yn shimti noh da u samla Lambokstarwell Marngar bad ia ka kam General Secretary yn shimti noh da u samla Donald V Thabah. Ki la don ruh bun ngut ki nongialam ba kham hakhmat ka KSU ki ban sa shongthait noh ha kane ka samoi treikam ka ban wan.
Ia kane la pynthikna katkum ka jingpyntip jong u Chairman ka Election Committee samla Daniel Khyriem bad u Secretary ka Election Committee u samla Samuel Jyrwa ha kaba ki la pyntip ba la dep bishar lut ia ki kot ki sla jong ki kyrtong ki ban ia khun ha katei ka elekshon jied nongkitkam thymmai ka KSU Central Body bad ia ka elekshon ba XIII yn pynlong ha ka 11 tarik u rymphang naduh ka por 8 ubaje mynstep haduh ka por 3 baje janmiet ha Dinam Hall, Jaiaw-Shillong.
Katkum ka jingthep kyrteng la pyntip ba ia ka kam President la thep tang da u samla Lambokstarwell Marngar marwei hi bad ym don ba ia khun pyrshah ia u, ia ka kam Vice President la thep tang da u samla Shemphang Lyngdoh Mawphlang khlem don nongiakhun pyrshah kumjuh ruh ia ka kam General Secretary tang da u samla Donald V Thabah khlem don nongiakhuh pyrshah.
Ki la don katto katne tylli ki kam ba ki don ki ban ia khun ha katei ka elekshon kum ka kam Asst. General Secretary u samla Sonstar Nongkhlaw bad u Sumarlang Lyngdoh, kam Organisisng Secretary u samla Barikular Nongsiej bad u samla Biangbor Paliar, kam Education Secretary u samla Readyonstone Nongrum , Truelywell Lyngdoh bad Micheal Lawai Lyngdoh, kam Publicity Secretary u Ostarnic Marbaniang, Reallystar Nongspung bad u Rapbor Nongrum, Office Secretary ki don haduh 6 ngut ki nongiakhun.