Ka jingkwah jop elekshon palat, ka thom wat ia ka thok ka thak

Shillong, 9 Rymphang:
U Bah HS Shylla, MDC jong ka Nongkrem, u pan jingshai na U bah Ardent Basaiawmoit, halor ka jingkren jongu, ha ka dorbar Pyllun jong ka Laitkor, ha ka 7tarik Rymphang 2017, la ka long ka jingkren kaba u shu mutdur ne ka dei shisha, kaba la kren da U Bah HS Shylla, ha ka por kanbas elekshon bad ka jingkren, kaba la sot da U bah Shylla, kaba la pynmih ruh ha U Rupang, ha ka 8tarik Rymphang 2017, ka ong “Hynrei mynta ngi la sngew donbok ba ha ka por ialap elekshon une u MDC jong ngi u la kular ba tang hapoh shi bnai un law noh ia kane ka thain na ka MUDA, ngi sngewkmen eh nga lei nga ong ym tang shi bnai hynrei ngin ai lad 10 bnai ba un weng ia kane ka jingeh.”
Halor kitei ki jingkren, U bah HS Shylla, u ong, ba uba la kren ia kitei ki kyntien, u dei uba la long MLA arsien bad ruh da u CEM barim ka KHADC bad ruh u President jong ka HSPDP, bad khamtam da u Rangbah uba dei ban ia kynduh man ka por ha ka madan jong ka thma ktien. “Kitei ki kyntien ki dei ki namding ba une u Rangbah u pynkhreh ban ther ha ka madan thma jong ka elekshon MLA ha ka snem 2018. Ka jingkwah jop elekshon palat ka thom wat ia ka thok ka thak”. La ong biang ka kyrwoh jong U bah Shylla “Kumta, ngam banse khlem da dawa ba une u Rangbah u dei ban da pynshisha da kaba shai kdar ba dei ma nga ba la kren ia kitei ki kyntien ha ka por elekshon shiteng samoi sha ka KHADC. Ka shi bnai hadien ka elekshon kata hadien ka 16.12.2016 ka dei thik ha ka 16.1.2017 kaba mut ba nga la dei ban risain noh na ka jinglong MDC namar ba nga khlem lah pynlong ia kaei kaba nga la kular”.
U Bah Shylla, u ong shuh shuh ba um kwah ban leit jngai halor kane, hynrei kaba u kwah ka long tang khyndiat ka jingpynshai na utei u Rangbah “La u shu mutdur ba nga kren ia kitei ki kyntien lane ba ki  da dei shisha ki kyntien kiba nga la kren. Lada I kam ba ka dei ka jingshisha te ngin hap ban iaid katkum ki lynti jong ka ain ban pynshisha khlem kano kano ka jingkahdum bad ha kaba kum kata ka por lada shem ba ka dei tang ka jinglamler jong I in hap ha ka jingpynsajia katba dawa ka ain khamtam ba ka dei da u Nongthaw-ain (Legislator) jong ka Jylla Meghalaya. Namar ha kano ka nongrim ngan leit ai kum katei ka jingkular ba tang shi bnai ngan lah ban weng ia ka MUDA” pynkut ka kyrwoh na U bah HS Shylla, MDC kaba la pynmih mynta ka sngi.