Hapdeng ka jingshongkun kut ka ‘Shad Sajer’ ka Raid Nonglyngdoh

Nongpoh, 08 Rymphang:
Da ki spah ngut ki paidbah na ki shnong ba marjan ka thain Nongpoh, mynta ka sngi ki la kiew sha u Lum Kyntang Lehniam ka Raid Nonglyngdoh ban sakhi ia kata ka ‘Shad Sajer’ kaba (VII) ia kaba la pynlong da ka Seng Pynneh Riti Raid Nonglyngdoh (SPRRN) manla u snem ha ka shnong Mawjong, Ri Bhoi District.
Kum ban shu ong hangne, ka jingthmu jong ka SPRRN ban pynkhie im biang ia ka ‘Shad Sajer’ ka long kum shibynta ban phaidien bad kynmaw biang ia la ka jong ka Riti Dustur, kaba la ialam da ki Longshwa Manshwa, namar kum ban ong ka ‘Shad Sajer’ kaba dei kawei na ki Shad Tynrai kaba donnam ym tang ha ka thain Nongpoh, hynrei ha ka district bad jylla ruh kumjuh
Haba phai sha kane ka ‘Shad Sajer’ kaba la long mynta ka sngi, la nang pynphuh pynphieng da ka jingdonryngkat u Bah PN Syiem, CEM ka KHADC kum u Kongsan, u Bah W. Syiem, Sirdar ka Nongpoh Elaka Sirdarship, ki Lyngdoh Raid, ki Rangbah Shnong, ki longkmie longkpa, ki khun samla lem bad ki heprit.
U Bah PN Syiem, haba kren kum u kongsan, nyngkong eh u la pynpaw ia ka jingkmen ban iohi ia ka jingshimkhia da ki nongialam ka SPRRN, kiba la trei shitom ban iai bteng ia kane ka ‘Shad Sajer’ kaba long ruh kum shibynta ban pynneh ia la ka jong ka Riti ka Dustur, kaba la buh da ki longshwa manshwa.
“Ka la dei ka por ba naduh ki Raid bad Hima ki dei ban pynim bad don noh ia la ki jong Riti Dusturdon, ha kajuh ruh ka por nga kyntu iaphi naduh ia u Sirdar bad ki nongialam Raid ba kin iatreilang na ka bynta ban kyntiew shuh shuh ia kane ka ‘Shad Sajer’, ong u Bah PN Syiem.
Namarkata, na ka bynta ban nangkyntiew shuh shuh haba iadei bad ki kam pynneh Riti Dustur bad khamtam eh ban kyntiew ia ki kam jngohkai pyrthei ha ka jylla, ka District Council ka la thmu ruh ban pynheh ia ka Budget ha ka Arts & Culture bad haba iadei bad kane ka jaka kaba la pynlong ia kane ka ‘Shad Sajer’ ka long kaba biang bha wat ban pynlong ia ka kum ka Tourist Spots, ym tang katta hynrei ban pynrung ruh ia kane ka jaka sha ka Tourism Map, u la bynrap.
La pynphuh pynphieng ha kane ka ‘Shad Sajer’ da ka jingiashimbynta jong ki riew tymmen bad khun samla ha ki jingshad tynrai bapher bapher ba kynthup naduh ka Shad Shutt Wait, ka Shad Mastieh Sawngut, ka Shad Kynjuih Kynthei, ka Shad Malangho, ka Shad Doh Mahi, ka Shad Mastieh Arngut, ka Jingtem Marangod lem bad kiwei kiwei ki jingphawar ha ki sur bapher bapher.
Ha kane ka sngi, la ioh ruh ia ka jingkren na u Bah W. Syiem, u Bah Hendry Nongrum Chairman ka SPRRN, u Bah O.P Lyngdoh, u Bah Liander Syngkli lem bad kiwei dei ki riew rangbah.