Da ki spah ngut wan iasoh UDP, ki paidbah ha ka thain Umroi

Nongpoh, 07 Rymphang:
Da ki spah ngut ki paidbah na ki Party bapher bapher kiba don ha ka thain Umroi, ki la wan ban pyniasoh ialade bad ka Party UDP bad ia kane la sakhi mynta ka sngi ha ka jingialang paidbah kaba la pynlong da ka Party UDP, Umroi Circle ha ka shnong Lumsohpieng, Bhoirymbong, Ri Bhoi District.
Ha kane ka jingialang paidbah kaba la pynlong da ka UDP, Umroi Circle, la iadon ryngkat naduh Dr. Donkupar Roy, President ba rangbah ka UDP bad u u Bah Bindo M Lanong, Senior Working President ka UDP, u Bah G Nongrum, Secretary Incharge ka Ri-Bhoi District lem bad kiwei kiwei ki nongkitkam ka Party UDP bad riew rangbah ha katei ka thain.
Ha kane ka sngi, la iohi ruh da ki spah ngut ki nongkyrshan na ki Party bapher bapher kiba don ha katei ka thain Umroi, ki la wan ban pyniasoh ialade bad ka Party UDP, hadien ba ki la ngiah ban kyrshan ia la ki jong ki nongmihkhmat.
Haba kren pdiang burom ia kine ki nongkyrshan kiba la wan pyniasoh ialade bad ka Party UDP, u Bah Bindo M Lanong, u la ong ruh ba ka party UDP ka dei ka party ha ka jylla hi baroh kawei ym tang na ka bynta ki khasi namar kadei ka party kaba don ka jingiatreikam sha baroh ki bynta ha ka jylla hi baroh kawei.
U la kynthah ruh ia ki MLA Congress, da kaba ong ba kat shaba leit ha kine ki sngi ki paidbah ki ud na ka jingjur ka kam sniew, ka jinghiar ka kamai ka kajih, ka synshar ka khaddar, ka akor ka burom haka imlang ka sahlang bad kane ka la jia tang namar ka jingrhah bad lalot pisa da ki MLA Congress bad ka jingsynshar sniew ka Congress, kaba la ialam da u Dr Mukul Sangma.
Shuh shuh, u la ong ruh ba dei ka party congress kaba wanrah kat kane ka huri ka hura ha ka jylla, hynrei ka shong pat ha ki paidbah ban bishar bniah halor ki kam jong ka party congress, la kin dang ailad biang ne em ha u snem 2018 ba kan wan biang ha ka bor synshar.
Katba na ka liang u Dr. Donkupar Roy, u la pynkynmaw halor ka thungkam thungjam hapoh ka jingsynshar ka congress, ha kaba bun naki samla ki dei ki ba khlem kam khlem jam ba wat ki trai muluk kim ioh kam wat lada ki la biang ki kyrdan pule.
U ther tyngeh ruh, ba kat haduh mynta ka sorkar Congress kam pat lah ban pynbeit ia u pud u sam ka jylla bad kaba la wanrah jingeh ia ki paidbah, khamtam eh ia kito kiba sah ha ki thain Khappud bad ka Assam, jin lada ka UDP kan wan ha ka bor baroh ki ophisar naduh ki DC, ki pulit ki dei ban long ki briew kiba sngewthuh ia ka kam, ka riti ka dustur bad ka synshar ka khaddar tynrai hapoh ka jylla, u la bynrap.