“Ka Sixth Scheduled ka iada ia ka Meghalaya ban wan tyllep ki briew”

Shillong, 7 Rymphang:
Haba pynshngain na ka jingtieng ia ka jingwan tyllep ki briew ba nabar sha ka jylla, u myntri khynnah ka tnad rel ka ri u Rajen Gohain mynta ka sngi u la ong ba ka jylla Meghalaya ka don ka Sixth Schedule kaba iada na ka jingwan tyllep ki briew bad ka jingshna ia ka lynti rel kan nym ktah ia ka jingwan buhai shnong ki briew nabar.
Haba kren hadien ba la mih na jingialang sha ki nongthoh khubor, u Gohain u la ong “Ka Meghalaya kam don jingktah na ka jingwan ka lynti rel namar ba ka don ka Sixth Scheduled. Ha Meghalaya, ym don ba lah ban thied jaka kiba nabar namar ba ka don ka Sixth Schedule ban iada ia ki trai shnong”.
U la ong ba haduh mynta ka sorkar jylla kam pat aiti ia ki jaka ban shna ia ka lynti rel sha rilum Khasi.
“Ban pyrshah ia ka lynti rel kaban wanrah ia ka roi ka par, kam long kaba sngew dei tang namar ba tieng ia ka jingwan tyllep ki briew nabar bad ki dei ban sngewthuh ia ka”, la ong u Gohain uba kren da ka ktien Hindi hadien ba la wai ka jingplie ia ka iew Digi dhan Mela. U la ong ba ka jingwan tyllep ki briew nabar ka lah ban wan wat lada kam don ka lynti rel ruh tangba ki trai shnong ki dei ban sngewthuh ba ki briew ki wan sha Meghalaya kum ki nongshangkai ym kiba wan ban buhai shnong
“Nga la iakren ia ka jingsngew jong ki paidbah ka jylla bad ka myntri ka kong Ampareen Lyngdoh. Ka la pynthikna ba ka sorkar jylla kan ai ia ka jingiatreilang bad ka sorkar pdeng halor kane ka bynta”, u la ong.
U la ong ba ka lynti rel sha Meghalaya ka long kaba donkam eh na ka bynta ban wanrah ia ka roi ka par kaba sted namar ba kane ka dong mihngi ka dei kaba sahdien bha. U la ong ba mynshem snem ka sorkar ka la mang pisa T. 300 klur ban shna lynti rel ia ka Meghalaya hynrei khlem lah ban pyntreikam.
Hynrei ha kajuh ka por, u la ong ba mar mar hadien ba ka sorkar jylla ka aiti ia ki jaka, ka sorkar pdeng kan sdang noh ia ka jingtrei ban shan lynti rel namar ba ka sorkar ka la mang pisa biang T. 300 klur na ka bynta kane ka kam.
Lah ban kdew ba ki sengbhalang khamtam ka KSU ka la pyrshah tyngeh ia ka jingthmu wanrah lynti rel sha ka Meghalaya halor ka nongrim ba kan wanrah ia ki jingwan buhai shnong ki briew nabar kaba lah ban tyllep syndon ia ki trai shnong rit paid. Ha ka jingshisha, ka sorkar pdeng ka la pynlong ia ka jingsurbe ia ka lynti sha thain Ri-Bhoi bad ka la don ka jingthmu ban pynpoi lynti rel haduh New Shillong.