Kyntait U Director ka Soil, ba phah sahmiet ia ka Peon

Shillong, 06 Rymphang:
U Director ka tnad Soil and Water Conservation u Bah Donald Langstieh u la kyntait ia ka jingkynnoh ka Orderly Peon ka Kong Wanpli Mary Lyngdoh Sawkmie, ba u la phah sahmiet ha iing jongu bad pyndik ia ka, kumba ka la kynnoh.
Haba pynlait khubor mynta ka sngi, u Bah Langstieh u la ong, “Ha shwa ba ka Kong Wanpli kan sdang ia ka kam, la bthah ia ka ba kan wan ialam ia kiba ha iing khnang ban ioh batai ia ki kamram jongka Orderly peon. Kumta ha ka 31 tarik Risaw, kiba haiing jongka, ki la wan bad la batai ba kamram jong ka Orderly Peon ka long ha quarter jong u ophisar bad ka hap ban trei ia ki kam iing. Ka jingiakynduh bad kiba ha iing ka long kaba iabeit jingmut bad kumta ka la sdang ban trei ia ka kam jongka tang ha ka por mynsngi.”
U la ong biang, “Ha ka por interbiw la pyntip ia baroh kiba ialeh ia ka jait kam aiu ba ki Orderly Peon ki dei ban trei ia ki kam iing. Ia kane ruh, ka Wanpli ka la mynjur hynrei ka la kylla ba mut pat hadien”.
Kat kum ka jingong u Director, ka la kyntait ban trei ia ki kamram jongka bad namar ba u dang bunkam u la buhteng shwa ia kane ka kam bad ka. U la ong ba hadien kine kiei kiei, ka jingsngew ka long ban ai tulop ia ka nongtrei kaba kyntait ban trei ia ka kamram jongka, ka ktah jur ia ka jinglong jingman hapoh ka ophis baroh kawei bad dei halor kane ka nongrim ba la pynsangeh tulop shipor ia ka bad la pynkynriah kam ruh sha Conservation Training Institute, Byrnihat ha ka 8 tarik Naiwieng, 2016.
Kane ka jingleh ban pynbeit ia ka, ka long ban pynbeit ia ka jingleh sting jongka ia ka kamram kaba dei ka kyndon pyniaid kam ha ka ophis, da kaba shu ai ka jingpynsaja kaba jem da ka jingthmu ban pynbeit ia ki jingleh jongka, la ong u director.
U la ong ba hadien kane, ka Wanpli ka la ai jingthoh sha u Principal Secretary ha ka 10 tarik Naiwieng, 2016 ha kaba u la ai ia ka jubab ha ka 20 tarik Naiwieng, 2016 bad la phah jingthoh sha ka Treasury ba kan pynlait noh ia ka tulop jongka.
“Ki jingshim kyndon ia ka Wanpli ki long na ka daw ban wanrah ia ka jingiaid beit iaid ryntih ha ophis bad kumjuh ban pynbeit ia ki jingleh bakla jongka hynrei ym kumba la kynnoh ha ki kot khubor. Ki jingkynnoh jongka baroh ki long kiba khlem nongrim, ki bym don jingshisha bad kiba la leh tang ban pynthoh bria ia ka kyrteng jong nga”, la ong u Bah Langstieh ha ka kyrwoh.