Batbor u nonghikai ia ka khynnah skul ha Sohiong

Shillong, 6 Rymphang:
Ka CSWO bad ka TUR ki la ujor pyrshah ia uwei u nonghikai skul ha Sohiong halor ka jingkynnoh ba u la batbor ia kawei ka khynnah skul. La ujor ha ka sngi saitjain jong ka taiew ha Sohiong Outpost pyrshah ia u nonghikai uba la tip kyrteng kum u Konesshon Rodborn uba hikai ha Tlong Umiam Secondary School ha Weilyngkut-Sohiong. La kynnoh ba ha u snem ba la dep kata shuwa ka eksamin Selection ki khynnah ba ia leh ia ka eksamin matrik utei u nonghikai u la leh kynshleiñ ia kawei ka khynnah klas X kaba dang 17 snem karta bad u la doh u la kdup ia ka da kaba ring video da ka mobile jong u. La rejistar ia katei ka kes ha Laban PS, namar ba ka Sohiong Outpost ka hap hapoh Laban PS bad la phah ia katei ka kes na Sadar PS. Ha katei ka jingujor la ong ba utei u nonghikai u ju pyni ia katei ka khynnah ia katei ka video ba u la ring dur por ba u leh kynshleiñ ia ka bad u la ong ba lada kam shah ia u ban shonglok ia ka un sa thad madan ia katei ka video bad u la pyni ruh ia katei ka video ha ki para klas jong ka.
Ka jingujor, ka la ong ba ha ka 20 tarik u kyllalyngkot katba ka dang leit sha skul ban leh Test, u tei u nonghikai u la pyntieng da kaba ong ba un leit pyni ia ka video sha u Head Teacher jong ka skul bad kumjuh ruh sha ki briew katei ka shnong lada jia ba kam treh shonglok ia u bad la ong ba hapdeng ka jingtieng ka la pyndem ialade bad u la batbor ia ka ha kamra jong uwei pat u nonghikai ba la tip kum u Sir Chaudhury kaba don hapoh katei ka jaka ba don ka skul ha ka nohphai sngi jong katei hi ka sngi ka 20 tarik bad hadien ba u la dep batbor u la ai ia ka mobile jong u ha ka bad u la ong ba mynta ka la lah ban delete ia ka video.
La kynnoh ruh ba utei u nonghikai u la leh kynshleiñ ia kumba 6 ngut ki khynnah kynthei bad la ong ba u la leh kynshleiñ ruh ia kawei ka khynnah klas IX kaba dang 17 snem karta. La ong ba u la pyntieng ruh ia katei ka khynnah da kab aphah ba kan doh ia u bad u la pyntieng ba lada kam ngeit ia kaba u ong un ym pyn pass ha ka eksamin. Ha katei ka jing ujor, la kdew ruh ba ka jingpynslem ban ujor ka dei namar ba katei ka khynnah ka don hapdeng ka jingtieng bad kumjuh ruh namar ka jingtieng ia ka pisa ban ujor lada poi mukotduma. Ka CSWO bad ka TUR ki la dawa ban pynngat ia utei u nonghikai hapoh ka POCSO Act bad Criminal Law Amendment Act, 2013.