Na ka Synod ha Nonglang, hiar jurip U MLA & ki MDC

Nongstoiñ, 5 Rymphang:
U Chairman jong ka District Council u bah LG Nongsiej ha ka sngi Saitjain, u la hiar ban leit jurip ia ka surok Mawsyrpat kaba dei ka surok ka ban pyniasoh naduh Seinduli shaduh ka shnong Nonglang ia kaba ka District Council, ka la ai kyrpang na ka bynta ka jingpynkhreh ia ka jingiaseng Samla KJP Synod Sepngi ka ban sdang naduh ka 24-26 tarik mynta u bnai ha ka balang Presbyterian Nonglang.
Ha katei ka jingleit jurip ia katei ka surok la iadon ryngkat lang ruh u MLA ka Rambrai Jyrngam u bah KP Pangniang, u MDC ka Mawshynrut u bah Morning Mawsor, bah Kimfa Marbaniang MDC ka Rambrai ki briew jong ka balang bad kiwei kiwei.
Ka jingioh ia katei ka surok lyngba ka jingiarap kaba kyrpang na ka District Council na Mawsyrpat shaduh wah Tyrsung bad pei shaduh ka surok PWD Nonglang, ka la long ka jingkyrkhu kaba khraw ia ki paidbah ka thain khamtam ban pynsuk ia ka leit ka wan bad ruh ban pyllait na ka jingdheng kali ha katei ka jingiaseng Synod namar katei ka surok ka la pynjan bad pynsuk shibun na ka bynta ban poi sha Mawshynrut Block.
Ia katei ka surok na Mawsyrpat shaduh Wah Tyrsung kaba don kumba 4 KM ei ei, la pyntrei da u MDC ka Mawshynrut u bah Morning Mawsor lyngba ka skim District Council ha ka jinglut kaba la kot shaduh ka 28 lak tyngka, katba ia ka basah nangtei na wah Tyrsung shaduh ka surok PWD Nonglang la iarap ban maramot khambha shuh shuh da u MLA ka Rambrai u bah KP. Pangniang.
Hadien katei na ka liang jong u Chairman ryngkat u MLA bad kitei ki MDC, ki la leit ruh ban jurip ia ka madan ha shnong Nonglang kaba dei ruh ka madan ban pynlong ia katei ka jingiaseng bad ban pynbha shuh shuh ia katei ka madan na ka liang jong u Chairman u bah LG. Nongsiej u la ai ruh ka jingiarap sha ka balang kumba 15 lak tyngka lyngba ka skhim District Council, katba ia kiwei kiwei pat ki jingdonkam kiba kynthup naduh ki jaka iaid kjat, ki jaka ieng kali bad ki surok ban pynpoi sha manla ki jaka ieng kali la noh jingiarap da u MLA bad MDC ka Rambrai.
Haba iakren bad ki nongthoh khubor ha katei ka sngi na ka liang jong u bah LG Nongsiej u la pynpaw ia ka jingaikhublei kaba kyrpang ia u CEM ka KHADC u bah P.N. Syiem uba la sngap ia ka ka jingkyrpad jong ka balang lyngba jong ki MDC ban pynioh ia ka jingiarap na ka bynta katei ka jingiaseng synod.
Katba na ka liang jong u MLA u bah KP Pangniang haba iakren bad ki nongthoh khubor u la pynpaw ia ka jingsahnud khyndiat ha kaba iadei bad ka jingpyntrei ia ka surok na Wah Tyrsung shaduh pdeng shnong kaba don kumba 1KM ka jingjngai bad kaba dei ruh ka skim Synod kaba 1 klur na ka tnad PWD kaba dang sahteng haduh mynta bad halor katei ka bynta na ka liang jong u bah Pangniang u la ong ruh ba u la dep ban leit iakynduh ruh ia u Myntri ka PWD bad na ka liang jong u tei u myntri ruh u la kular ba na ka liang jong ka sorkar kan sa leh ia kaba donkam.