Bthei ki Bulb, duh ki TV ha Umshing

Shillong, 5 Rymphang:
Ki Bulb light ki la bthei , ki television (TV) ki la duh, ki Washing Machine, ki Mobile, ki Computer, ki Refrigerator, ki Motor tan um bad kiwei pat ki tiar ba pyndonkam da ka bor ding ( Electronics) namar ka jingkhlain kynsan ka bording. Katei ka jingjia ka la jia mynhynnin ka miet ha ka shnong Umshing kaba don marsyndah bad ka NEHU. La ong ba mynhynnin ka miet ha ka por 9 baje eiei ka bording ka la khlain kynsan ne kaba ki ong ka high Voltage ha ka tei ka shnong ha kaba bun ki longing ki hap shongdum namar ka jingduh ki bulb bad bun ki la mad ia ka jingduhnong namar ka jingduh noh ki tiar rem dor jong ki.
Katkum ka jingiathuh jong kawei ka longkmie ka la ong ba katei ka jingjulor tang ha ka ing jong ka la kot sha ki phew hajar tyngka, katba uwei u rangbah pat u la ong ba katei ka jingkhlain kynsan ka bording ka la pynkyndit ym tang ia u hynrei ki ksew jong u ruh ki kyndit bad ki ia jlew namar ka jingthaba kynsan ka bording ha ki bulb light.
La ong ba ha katei ka por ba jia katei ka jingjia ka dei ruh ka por ba ki briew ki dang ia shongkai ha la ki jong ki ing bad don kiba dang charge mobile, kiba dang peit TV, kiba dang plie kompitor , kiba dang tan um ha ing da u motor jong ki. Kham hadien la iathuh ba namar katei ka jingjia ka tnad bording ka la pynlip ding ruh ha Umshing. Ki briew kiba la shah ktah ha katei ka jingjia ki la ong ba kin ujor shuwa sha ka Dorbar Shnong ba kan ia kren ia kaba donkam bad ka tnad MeECL. Ym shym la don kano kano ka jingjia ba sngewsih ia ki briew.