Pan jingshai ka KSU na ka MPSC, ba khot kam ia ki khar Bangla

Shillong, 30 Naitung:
Ka jingpynmih jingpynban ka Meghalaya Public Service Commission (MPSC) na ka bynta ki kam ba lait ha ka tnad Forest department ban khot ia ki Bangladesh kiba sah ha India, ba kin thep ia ki kam, ka la pynbitar jur ia ka KSU bad ka la pan jingshai na MPSC halor kane.
Ka KSU ka la pan jingshai na ka MPSC halor kane balei da donkam ban
khot thep kam ia ki nongBangladesh.
Ka MPSC dang shen ha ka jingpynbna tung kam ha ka tnad Forest ka jylla
na ka bynta kam Assistant conservator ha ka Forest na ka bynta ki
nongshong shnong ka Meghalaya ha kaba la kdew ba ki NongBangaldesh
kiba shim ia ka jinglong nongshong shnong ha India, ki lah ban wan
thep ia kane ka kam. U general secretary ka KSU u samla Auguster
Jyrwa u la ong ba hadien ka jingiakynduh bad ki heh ka MPSC ha kane ka
sngi Hatmajai, halor kane, ka seng kam lah ban ailad bad ka sorkar ka
dei ban pynshai”.
U Sama Auguster u la ong ba u secretary ka MPSC u la aid aw ba ka
jingpynbna ka la wan na ka tnad Forest department bad na kata ka daw,
la shu pynbna beit na ka liang ka MPSC.
Ka jingpynbna ka la ong, “ki briew kiba shah kynriah na ka East
Pakistan (Bangladesh mynta) kiba sah ha kane ka jylla Meghalaya ne
kiba thmu ban sah junom ha kane ka jylla ne ka ri India, kiba don ki
kot ki sla kum ki nongshong shnong ka India, ki lah ban aplai ia kane
ka kam.
Ka KSU ka la ong ba kan thoh sha u Chief conservator ka tnad Forest
ban pan jingshai halor kane ka bynta.