Lum RS U bah Paul bym ioh lyer shet

Shillong,29’lyngkot:
U bah Paul Lyngdoh u la lum ia ka jingialang bad ki Rangbah shnong jong ka Shillong West konstitwensi ban ia kren halor ka mat kaba ia dei bad ka jingbym ioh lyer shet thikna ki paidbah bad ka jingbym ioh ia ka Card Rashon. Ha katei ka jingialang kaba la long ha MLA Hostel la wan ban iashim bynta da u Deputy Commissioner ka East Khasi Hills u bah Peter S Dkhar lem bad ki nongialam shnong jong ki shiphew tylli ki Dorbar Shnong kiba hap hapoh ka Shillong West Constituency.
U Bah Paul Lyngdoh la ong ba ka ha ka jingiadei bad ka jingkyrduh ia ki Gas LPG, ka jingialang kala rai ban transfer ne pynkynriah noh ia ki 3000 ngut ki nongshim Gas na ka Khasi Pnar Gas Agency namar ba kane ka Agency marwei kala khia palat ka jingkit bad kam lah shuh ban pynbiang ia ka Gas sha baroh ki paidbah.
Ula ong ba ia kine ki 3000 ki paidbah nongshim Gas un pynkynriah noh sha ka MECOFED bad Meghalaya Gas Agency ban pynsting ia ka jingkit jong ka Khasi Pnar Gas Agency bad u DC ula kular ban lum ia ka jingialang halor kane ka bynta khnang ba ki paidbah kin ioh thikna ia ka lyer shet namar kumba long mynta ki nongshim gas ki ioh tang 6 tylli ki Gas Cylinder ha ka shi snem bad kila duh ei ia ka hok ban ioh 12 tylli kaba long kawei ha ka shibnai.
Ha kaba iadei bad ka jingbym mih kyrteng ki paidbah ban ioh ia ka card rashon, na ka liang u DC ula kular ban shimkhia ia kane ka kam bad ban pynthikna ba ki longiing kiba dei hok ban ioh kin nym duh satia iaka card rashon.