Kmen U Conrad ba mang pisa shna surok

Shillong, 29 ’lyngkot:
U MP Lok Sabha na Tura u Conrad K. Sangma u la pynpaw ia ka jingsngew kmen ia ka tnad DoNER lynggba ka North Eastern Council (NEC) hapoh ka jingialam u secretary u Ram Muivah kaba la shim khia ban mang pisa ban shna ia ki surok ha ka jylla.
U Conrad u la pynpaw ia ka jingsngew nguh ia u Muivah uba la pdiang ban mang pisa ban shna ia ka surok na Damra ha Assam sha Bajengdoba lyngba ka Mendi ha North Garo Hills ka Meghalaya.
Ka jingmang pisa ia kane la leh na ka NERSDS jong u snem 2017-18.
“Ka jingshna ia kane ka surok kan ialam ia ka thain ban kyntiew ia ka roi ka par bad khamtam ha ka khaii pateng”, la ong u Conrad.
U la ong ba ka jingsniew ka surok ha ka thain ka long kaba la palat kaba la ju pynsngew da ki paidbah ha ka por ba u leit jngoh. Kane ka surok ka jngai 38 km.