Sngewkhia ba tih dewiong beain

Shillong, 27 lyngkot:
Ka Forum (State Co-ordination Committee of Coal Owners, Miners & Dealer’s Forum) ka la shim khia bha halor ka jingmih ha ki kot khubor ia ka jingtih dewiong ba beain bad halor kane ka phang ka kyntu ia ki bor Sorkar ba kan pyrkhing ia ki kyndon jong ka ain ia kito lada lap kiba ialeh pyrshah ia ki jingbthah/ hukum jong ka iing bishar badonburom jong ka National Green Tribunal.
Ka Forum na ka por sha ka por ka iai kyntu, kyrpad ia ki dkhot jong ka kiba don ha baroh kawei ka Jylla ba kin ia kohnguh bad burom ia ka jingbthah/ hukum jong ka iing bishar badonburom jong ka National Green Tribunal, khnang ban lait na kino kino ki jingeh kiba lah ban mih bad ktah kylla. Ka Forum ka dang wad ki lad ki lynti ban pynioh biang ka tih bad ka khaii dewiong khnang kiba im ja kpoh na kane ka kam kin ioh bteng biang ia ka kam kaba ki ju ia trei ia ktah. Ka Forum ka la dep pynkhreh ruh ia ki jingai jingmut kiba janai bad kiba kham kyrpang ia kaba kan sa leit buh bad kyrpad iasaid lyngba ka mukotduma ka ban sa long ha iing bishar jong ka NGT ha ka 31tarik Kyllalyngkot 2017, ha New Delhi khnang ban pynmyntoi ym tang ia ki nongtrei bad nongkhaii dewiong hynrei ruh ban ia burom bad ban pynneh pynsah de ia ka mei mariang.