Ujor u heh FKJGP sha ka NHAI, ia ka surok Jowai-Malidor

Shillong, 27’lyngkot:
U President ka FKJGP Jaintia Hills u bah Tuesday Lytep u la thoh sha u Lt. Colonel Rajeev Malhotra, Project Director Shillong- NHAI SE Eastern Circle Lower Lachumiere, Shillong ban ujor halor ka jingbym biang ka rukom shna ia ka surok Jowai-Malidor Double Lane Project ba la pyntrei da ka GR Infrastucture kaba jngai 102 kilomitar.
Ha katei ka shithi u bah Lytep u la ong ba ka rukom trei ia ka surok kaba don mar pyrshah ka Jowai Civil Hospital la sakhi ba ka long ka bym biang ha kaba ym shym la pynkhlaiñ ia ka nongrim kynroh kaba rim shuwa ban tei kynroh thymmai bad kate ka buh jingma ia u paidbah. U la kdew ruh ba ha Tuber ka rukom tih khyndew ka long pynieng beit shriak bad katei ka buh jingma ha ka por slap ba ka khyndew ka lah ban twa. U la ong biang ba ym don nala surok ha 4 Mer (Soomer) haduh ka shnong Tuber. U la kyrpad na utei u heh ba un tuklar ia katei ka kam.