Ai jinghikai ban pynduh ia ki pisa kot ha Khliehriat

Jowai, 25 lyngkot:
Ka CSC e-Governance lane ka CSC SPV, da ka jingiarap jong ka NIC bad e-District, ka la pynlong ia ka jingai jinghikai ha ka thong Digital Financial Inclusion (towards a Cashless society) ha DC Office, Khliehriat, East Jaintia Hills, ha ka 24 tarik u Kyllalyngkot 2017.
Ha kane ka sngi U Bah Joshua Lyngdoh, na CSC SPV, u ba long ruh u nongpeit jong jong ka CSC SPV hangne ha Meghalaya, u la batai bniah shaphang ka jingthmu jong ka sorkar ban iaid sha ka thong ban pynduh lane pynduna ia ka jingpyndonkam ia ka pisa kot, ban pyndonkam da ki tiar digital kum ki debit lane prepaid card, mobile bad computer ha ka jingpyniaid ia ka pisa pilain, ha ka die ka thied bad kiwei ruh ki kam kiba iadei bad ki kam pisa lane ki kam bank.
U Bah Joshua Lyngdoh u lah ai ruh ka jinghikai ha ki rukom bapher bapher ban pyniaid pisa lane ban die ban thied da ki kor digital kum ka USSD (Unstructured Supplementary Service Data), AEPS (Aadhaar Enabled Payment System), UPI (Unified Payments Interface), e-Wallet bad kiwei ruh ki Banking Apps.
Ha kane ka jingialang u BDO jong ka Khliehriat, u Bah CP Mawkon, u la iathuh ba lah ban pyndonkam da ka rukom digital haba siew ia ki jingsiew bapher bapher bad ki tulop ha block office bad katno ka la pynsuk bad wanrah ia ka jingbha ha block.
Ha kane ka jingialang lah shim bynta ruh da ki Village Level Entrepreneurs (VLEs) jong ki CSCs na East Jaintia Hills bad ki Officers jong ki tnat bapher bapher jong ka district.