Weng pakhang shnong ka JSU

Jowai, 30 Naitung:
Ka Jaintia Students’ Union (JSU) hadien ka jingia shong pyrkhat sani bha jongki nongialam mynta ka sngi, ki la rai ban weng shwa shipor ia ka pakhang shnong kaba 22 kynta kaba la dep ban pynbna ha kine ki kyndiat sngi ba ladep, halor ka nongrim ba na ka
liang U Mukul Sangma myntri rangbah ka Jylla bad kumjuh u myntri rangbah ba ar, U Ma RC Laloo, ki la kular hakhmat jongki paidbah babun kumjuh ha ki nongialam jongka Union ha ka 27 tarik une u bnai ha ka por ba plie ia ka District Court & Session Judge ha DC Ophis Jowai, ha kaba ki la khlei ba ka sorkar kan sa pyntreikam noh shen ia ka Civil hospital kaba don ha Ialong da kaba pynkynriah shwa ia ka Jowai Civil Hospital bad tei thymmai noh ia ka Jowai Civil Hospital.
Shuh shuh na ka liang ka JSU ka la ioh ruh ia ka jingkular na u myntri ka koit ka khiah ka sorkar Jylla, U bah AL Hek, ha kaba u la kular skhem ha ki nongialam (lyngba ka phone), namar u don sha nongbah Delhi, hynrei u la kular ban pyntreikam noh ia kine ki jingdawa ka JSU hapoh une u bnai Nailar 2013, namar ki dei ki jingmyntoi jong baroh ki paidbah nong shnongshnong jongka Ri lum Jaintia.
Shuh shuh u la kular ruh ba naduh ka 1 tarik u bnai Nailar, yn sdang noh hi ban leh ia kaba donkam ha kaba iadei bad ka jingpynkynriah ia ka Jowai Civil Hospital khnang ban dup lah ban shna thymmai pat ia ka Jowai Civil Hospital bad kumjuh ia ka blood Bank ruh yn ialeh ban pynkloi katba lah.
Halor kine ki jingkular, kumjuh hadien ba ka JSU ka la leit jurip ia ka Ing Blood Bank kaba don ha Civil Hospital Jowai la lap ba ka sorkar ka la dep thung pura ia U Dr. Nongbri u ban peit ia kane ka Blood Bank, bad dei halor kane ka nongrim ba na ka liang ka JSU ka la shim iaka rai mynta ka sngi ban weng shwa shipor ia ki jingiakhih tad haduh ka 15tarik Nailar 2013. Hadien ka 15 tarik lada ka sorkar kam pyni da ka kam ia kine ki jingkular na ka liang ka JSU kan iaid beit shakhmat.
Ha kajuh ka por na ka liang ka JSU ka dawa ruh na ka Sorkar ba hapoh kine ki por ba pynsangeh ia ka jingiakhih, ba ka dei ban ai daka jingthoh halor kine ki jingkular.