Pyrshah ka NESO ban long nong India ki mynder ri “Hindu”

Shillong, 24’lyngkot:
Ka North East Students’ Organization (NESO) mynta ka sngi ka la kren shai ba ka pyrshah ia ka aiñ ba la thmu ban wanrah da ka sorkar kata ka Citizenship (Amendment) Bill, 2016, kaba mut ba ia ki nong Bangladesh kiba dei na ka niam Hindu bad kiba wan poi sah sha India dei ban ithuh noh ia ki kum ki nong India. Ia katei ka rai la shim ha ka jingialang jong ka NESO kaba la long mynta ka sngi ha nongbah Guwahati. “Ka sorkar India ka dei ban tip ba ka thaiñ shatei Lam Mihngi kam dei ka jaka bret jaboh bad ka jaka bret niut kaba yn shu shu bret beit sha kane ka thaiñ ia ki nongbuhai shnong lada ki dei na India ne Muslim” ong u chairman ka NESO u bah Samuel Jyrwa.
U la ong ba ka thain shatei Lam mihngi kam shah da lei lei ruh ban pdiang ia ki mynder kiba wan hadien ka 1971 katkum ki rikod jong ka Assam.
Katei ka seng ka la ia kren ruh ia ka jingkynad kaba mih mynta ha ka jylla Manipur. U bah Jyrwa u la kyntu ba ka sorkar India ka dei ban shim jingkitkhlieh bad ban tuklar ia kaei kaba la jia ha Manipur, khnang ba ki paidbah kin ym shah ktah bad halor katei ka mat u la ong ba ka NESO kan ia kynduh ia u myntri sorkar pdeng uba peit ia ka tnad pohing ban kitkhia halor katei ka bynta.