Rai ka HSPDP Nongstoin ban nym pynmih khubor khlem da rai ka Seng

Nongstoin, 23 ‘lyngkot:
Ka Executive Committe jong ka Party HSPDP Nongstoin Area Unit, ka la pynpaw ia ka jingsngewkhia kaba jur halor ka jingpynmih khubor jong ki katto katne ngut kiba pyrshang ban pynthoh bria ia ka party, bad halor ka jingpynmih khubor jong u President ka Siejlieh Primary Unit ka EC kala kam ba kadei tang ka jingpynmih khubor shimet ka jong u khlem ka jingtip jong ka seng.
Katei ka pawshai ruh ha ka sngi nyngkong jong ka taiew ha kaba ka EC jong ka party HSPDP kala shong ia ka jingialang na ka bynta ban pyrkhat bad iatai sani bha halor katei ka bynta bad ka EC ha katei ka jingialang kala shim ruh ia ka rai ban leit ia syllok bad u tei u rangbah na Siejlieh ba ioh lehse kadei tang ka jingshim kabu jongno re jongno.
U bah Kwikstingwell Lyngdoh Secretary HSPDP Nongstoin Area Unit, haba iakren bad ki nongthoh khubor u la ong ba ha katei ka jingialang ka EC kala shim ruh ia ka rai ban nym shah shuh iano iano ban pynmih khubor pyrshah ia ka party khkem da iakren ne iarai da ka party bad u lada don kino kino kiba pynmih khubor khkem da tip lang ja party, ka party HSPDP ka pynshai sha ki paidbah nongkyrshan ba kidei ban shim ba kadei tang ka khubor lamler suda.
Shuh shuh u bah Lyngdoh u la ong ruh ba ka party HSPDP ka kyntu ruh ia ki paidbah nongkyrshan ba kimdei ban shah ialam bakla, ym tang kata ka party ka khot ka wer ruh ia ki dkhot jong ka party kiba la shah ialam bakla ba kin wanphai noh sha ka party HSPDP, bad na ka liang jong ka party ruh ka kloi ban pdiang da ka lynti kaba khuid kaba shai.
Nalor kitei ka Executive Committee jong ka Party HSPDP Nongstoin Area Unit, kala shim ruh ia ka rai ban pynkhlain ia ka party na ka bynta ban pynkhreh ia ka General Election 2018 da kaba kan sa pynlong ruh ia ka general meeting jong ka party ha u bnai ban wan.
Shuh shuh ka party ha katei ka jingiakynduh kala rai ruh ban iatreilang ryngkat bad ka HSPDP Central Body hapoh ka jingialam jong u president ba rangbah duh ka party u bah Ardent Miller Basaiawmoit bad baroh ki District Unit na ka bynta ban pynkhlain ia ka party ha ki liang baroh khamtam ban pynkhreh na ka general election 2018.
Ha kajuh kapor ka EC ka phah ruh ia ka jingaikhublei kitbok kitrwiang ia ka Mawthadraishan bad Sohiong HSPDP Area Unit kaba la pynjop donburom ia ki kyrtong na kitei ki ar Konstitwensi ha ka election shiteng samoi sha ka KHADC kaba dang shu dep shen.