Shillong, 30 Naitung:
Ka samla Marcia Mary Dohling ka dei kawei na ki khynthei Khasi kaba la pyndep (passs) ia ka jingpule kum ka nonghikai ha ka jingialeh kai iakura (boxing) na kane ka jylla.
Kane ka samla ba 28 snem ka khun nyngkong jong ka iing kaba sah ha Mawlai Kynton Massar ka la pyndep ia kane ka jingpule Diploma Course na NSNIS Patiala, Pynjab mynta u snem. Ka jingpule kaba long shi snem kynthih kynthup ka theory bad ka practical.
Lehse ka long ka burom ia ki kynthei jong ka jylla ban ioh ia ka coach ba nyngkong bad ruh ia ka iing ka sem, ka shnong bad ka jylla baroh.
Na ka liang u Ru pang u la ioh ban iakren bad kane ka samla kaba la pynpaw ia ka jingsngew tynnad ban long kum kawei na ki khynthei khasi kaba la lah ban pyndep ia kane ka jingpule na kane ka jylla.
Kane ka samla ka la pynpaw ba ka jinglehkai boxing hangne hapoh ka jylla ka dang long kaba sah dien haba ia nujor bad kiwei kiwei ki jylla kum Manipur, Haryana bad kiwei kiwei de.
Ka la ong ruh ba kane ka jinglehkai boxing kam dei tang ka jinglehkai jong ki shynrang hynrei kadei ka jingialeh ki khynthei ruh namar kane ka jinglehkai ka don da ki kyndon ban ia kura .
Kane Marcia ka la iathuh ruh ba nyngkong eh ka la shah jied ha ka SAI hynrei tang hadien lai bnai ka la mih noh namar ka jingkhlad jong ka kmie ka la hap ban pep noh bad namar ba ka dei ka khun nyngkong ka la hap ban peit noh ia ka iing ka sem jong ka.
“Nga la sdang nyngkong ha SAI hynrei da ka jingkhlad noh jong I mei ha la hap ban pep noh bad hadien nga la iakynduh ia I Sir Lari Kharpran bad nga la lah ban ioh biang ia kane ka lad ban bteng”, la ong ka samla Marcia.
Katkum ka jingongka samla Marcia ka Sports ha kane ka jylla ka dang sahdien bha bad kala ong ruh ba ka sorkar ka dei ban shimkhia ban pynbiang ia ki jingdonkam.
Ka la ong ba ha kiwei ki jylla,ki nongialehkai kiba wanrah ia ka nam ia ka jylla ki ioh jingiarap da kaba thungkam ha ki kam sorkar bad kiwei kiwei jingiarap hynrei ha kane ka jylla,kane ka jingmut kam pat long kaba biang namar ba ka sorkar jylla kam da phohsniew ban pynleit jingmut ia ki nongialehkai ban pynhslur ia ki.
Kumjuh ruh ha kawei ka liang ka la ong ruh ba ki kmie ki kpa kim dei ban khang lad ia ki khun kynthei ba kin mih shakhmat ba kin shim bynta ha kane ka jait jinglehkai. Bunsien ki kmie ki kpa jong ngi ki khanglad ia ki khun khynthei ban kin shim bynta ha kane ka jinglehkai hynrei ka ne ka jingsngew ka jong ki ka dei kaba bakla shibun namar ba kane ka jinglehkai kadei kawei nakijait jingkehkai kaba kongsan.
“Ha Manipur kane ka jinglehkai kala roi sted bha ha kaba ki kynthei ki mih shakhmat hynrei haba ia nujor bad ki shynrang jong kane ka jylla dang bun ki khynthei ha katei ka jylla”, la ong ka samla.
Ka samla Marcia ym tang ba kadei ka nonghikai iakura hynrei kadei kawei na ki nongialehkai kaba la lah ban wanrah ia ka nam jingjop ha kane ka jylla hynrei ka la ioh ban khur haduh 3 tylli ki takma jingjop ha kaba la wan ban ialehkai na kylleng ki jylla.
Kane ka samla Marcia kala don bad ka Lamlynti Boxing Association bad ka dang ai jinghikai ia ki khynnah ha polo ban pynkhreh naka bynta ka jingialeh na ka bynta ka State Level bad National game kaban sa wan.
Phi don ban ong eiei?