“Kiba duk ki ioh thiah bha, kiba riew spah ki hap thied dawai pynioh thiah”

Shillong, 17 ’lyngkot:
Ka jingkren u Myntri Rangbahduh ka ri u Narendra Modi, “Kiba duk ki ioh thiah bha, kiba riew spah ki hap thied dawai pynioh thiah’, ka lapynkiew jingbitar ia u Myntri Rangbah ka jylla u Dr Mukul Sangma, da kaba kynnoh ba ka dei ka jingkren ban pyniapher ia uba duk bad ba riew spah.
Hadien ba la pynbna ia ka jingpynduh ia ka 1000 bad 500 u Myntri Rangbahduh ka ri u Modi, dang shen, u la ong ba kito ki briew kiba im bad kamai da ka pisa kaba hok ki ioh thiah bha jai katba kito kiba kamai da ka pisa bym bok, ki hap ban thied dawai pynioh thiah.
“Ngi pynrem jur ia ka jingkren jong u Myntri Rangbahduh ka ri, ka jingkren ka bym shym la khmih lynti ban mih kat na u Myntri Rangbahduh ka ri, kaba thmu ban pyniapher hapdeng uba duk bad ba riew spah”, la ong u Dr Mukul mynta ka sngi. U la ther ia ka jingpynduh 500 bad 1000 jong u Modi, da kaba kynnoh ba ka dei tang ka jingthmu ban pynriew spah ia ki katto katne ki kompeni, ym na ka bynta u paidbah ka ri. “Ka sorkar pdeng ka la pynduh ia ka 500 bad 1000 khlem bishar bniah. Ka jingleh ka long ban pynsuk ia ki katto katne ki kompeni, da kaba pynjynjar ia ki paidbah ka ri baroh kawei”,la ong u Myntri Rangbah ka jylla.
“Ma ngi ruh ngi tip kumno ban ialeh pyrshah ia ka bamsap hynrei ym da kane ka lynti”,la bynrap u Myntri Rangbah ka jylla. U la ong ba kaba ma ka long ba ka ri kan iakynduh jingeh kumba jia ha ka ri Amerika ha u snem 2008-09 ha kaba ka ioh ka kot ka la hiar ar sut bad kane ka jingleh u Modi kan buh jingma ia ka ioh ka kot ha ka ri ha kine ki sngi.
Ka sorkar ka la kam ba ka jingpynduh 500 bad 1000 ka long ban ialeh pyrshah ia ka bamsap, ka pisa thok bad ki kam lehnoh hynrei u Dr Mukul u la kynnoh ba, “Hadien ba la pynduh ia kine ki pisa, ka la nang plie lad ban bamsap wat ha ki ophis bym ju don bamsap ruh kum ha ki bank, ha Income Tax department bad wat ha ka ophis ka RBI”. Haba ther tyngeh ia u Modi, u Dr Mukul u la ong, “U Modiji u la shim kabu na ka jinglong shi sur jong ki paidbah ka ri bad dei namar kane, ba ka Congress kan ieng ban leit ialap paidbah”.
U la ong ba katkum ka jingkhein ka sorkar pdeng, ki don haduh 15.43 lak klur ka pisa ba la wan thep hadien ba la pynduh ia ka 1000 bad 500. Katkum ka jingong jong u Dr Mukul, ki kam ka sorkar Congress ha ka por ka UPA kaba synshar shiphew snem, ki kham bang kham biang ban ia kane ka sorkar u Modi. “Ha ka sorkar UPA, ka Congress ka la leh bun ki prokram ban ialeh pyrshah ia ka bamsap, kum ka jingwanrah ia ka Lokayukta, ka RTI bad kiwei”, la ong u Dr Mukul.