Ngan sa kren, ynda dei ka por, ong U Bah Julius

Shillong, 12 ’lyngkot:
Ka Kashari District mynta ka sngi, ka la hukum ban set phatok 14 sngi ia u MLA ka Mawhati u Bah Julius K Dorphang, uba shah kem halor ka jingkynnoh leh beijot ia ka khynnah 14 snem.
Ia u Bah Dorphang uba long u chairman barim ka seng lehnoh bad kylla politishain, la rah ha ka Kashari hadien ba ki pulit ki la dep ia ka jingtohkit kaba san sngi kaba kut ha kane ka sngi Palei.
“Ka kashari ka la hukum ban set along khadsaw sngi ia u Bah Dorphang”, la ong u heh pulit hynne ka sngi. “Ngan sa kren ynda dei ka por”, la jubab u Bah Dorphang haba kylli ki nongthoh khubor mar syn mih na iing Kashari hapoh ka jingpahara ki pulit hynne ka sngi.
Ia u Bah Dorphang la pynngat ha ka kyndon jong ka POCSO Act 2012 halor ka jingkynnoh donkti ban leh beijot ia ka khynnah 14 snem, kaba lait phet na ka jingshah ring mraw. Ia u MLA ka Mawhati la kem na jaka ap bus ka inter-state bus terminus (ISBT) ba don ha Gorchuk, Guwahati ha Assam hadien ba u la phet rieh na ka jingshah thwet ha ki pulit haduh khadwei sngi naduh ba la ujor ejahar da ka State Commission for Protection of Child Rights (SCPCR).
Ha ka jingtohkit kaba san sngi kynthih ia u MLA ka Mawhati, ki pulit ki la iathuh ba u la phla ba u la leh shisha ia kane ka kam.
Lah ban kdew ba hynnin ka sngi ka Thma U Rangli (TUR) hapoh ka jingialam ka Kong Angela Rangad bad ka CSWO Ka Kong Agnes Kharshiing, ka la rai ba u Myntri tnad kam pohiing ka jylla, u Bah HDR Lyngdoh u dei ban hiar shuki da kaba sngew kitkhlieh halor ka jingjia ka kam awria ha hotel Marvelene Inn jong u khun jongu, u Bah Nathaniel O Rymmbai.
Lada um hiar shuki hi, u Myntri Rangbah u Dr Mukul Sangma u dei ban pynhiar shuki noh ia u mardor khnang ba ka jingtohkit halor ka jingjia pyniaid bad leh beijot kynthei, kan iaid beit bad kan long kaba laitluit.
Ka jingialang ka la pynrem jur ia u MLA ka Mawhati u Bah Julius K Dorphang uba leh ia ka kam sang nalor ba u dei u nongthaw ain, uba dei ban iada ia ki khynnah, kynthei bad ka imlang sahlang, u dei pynban u runar ban leh ia ki kam bymman. Ki la dawa ba dei ban ioh ia ka jingpynshitom kaba biang katkum ka ain Protection of Children from Sexual Offences Act (POCSO Act) 2012.
Ka jingialang ka la shim ia khyndai tylli ki mat ban dawa na u Myntri Rangbah kynthup ban hiar shuki u Bah HDR Lyngdoh ban ailad ia ka jingtohkit kaba laitluid, namar ba ka kam ka paw pyrthei hadien ba ka khynnah ka la lait phet na ka hotel Marvelene Inn ha Rilbong.