Dang artatien ka elekshon MDC, da ki Constituency thymmai

Shillong,28 Naitung:
Ka elekshon MDC ha u 2014, ka lah ban dang long da ki constituency barim watla bun ki MDC khamtam na ka liang syn shar ha ka KHADC ki kwah ba kan long noh da kaba thymmai.
Katkum ka khubor ba la ioh , la iathuh ba ka la don lypa ka jingpyn khreh na ki katto katne ki pyrshah ban phiah MDC constituency ban ujor da ka dorkhas sha ka Kashari tang shu mynjur u Lat ia ka KHADC Delimitation Amnement Bills, 2013. Katkum ka jingioh jingtip, la don katto katne ki briew kiba la pynkhreh ban ujor beit sha ka Kashari lada u Lat ka jylla, un ai ia ka jingmynjur ia katei ka Bill. Katkum ka rukom, ia ka jingujor sha Kashari, ym lah ban leh khlem da soi shwa u Lat ba ka Bill ka la long ain bad dei tang hadien ba la soi u Lat ban pdiang, lah ban ujor sha ka Kashari.
Hynrei namar ba kane ka Bill ka dang sah ha ka kti jong ka sorkar bad u Lat, ym pat lah ban ong ei ei bad dang ap la u Lat un mynjur ne em ia ka.
“Tang shu ai jingmynjur u Lat, yn ujor da ka dorkhas ha ka Kashari ban kyrpad ban pynsangeh ia ka jingpyntreikam ia kane ka Bill halor kane”, la ong ka tyllong khubor.
Lah ban kdew ba ka KHADC ka la pas ia ka Bill ban phiah ia ki constituency ha ka dorbar kaba long shen bad katkum kane ka Bill, ka Laitkroh kan jah noh bad kan mih thymmai ka Umsning constituency.
Nalor kane, la pynkynriah bad la pynrung ia ki shnong na kawei ka constituency sha kawei pat, haduh ba la mih bun ka jingpyrshah ia kane ka Bill na kiba bun.
Ka sorkar ka la thmu ban thaw ia ka Delimitation Commission ban bishar bniah ia kane ka Bill ka KHADC bad ka la don ruh ka jingthmu na ka liang ka sorkar jylla ban pynjlan wat ia ka por jong ki MDC khnang ban pynlah ban pyniaid shaphrang ia kane ka Bill kumba la thmu.
Katkum ka jingiathuh ki tyllong khubor, ka jingtreikam jong kane ka Bill kan shong ha ka Kashari lada kiba thmu ban ujor kin leh shisha.
U MDC ka Laitkroh Bah Carmel Sohtun u la pyrshah jur ia ka jingpas ka KHADC ia kane ka Bill ha ka por ba long dorbar. U Bah Carmel u la iasaid nia ba ka jingpas ia kane ka Bill ka long khlem da iaid katkum ki kyndon ba dei ban leh kum ka jingpynlong ia ka jingbishar paidbah, ka jingpan ia ka jingsngew jong kiba bun hynrei ka Executive Committee ka la shu thombor da ka bor ban pas ia da ka lynti ka bym dei ban leh.
U MDC ka Laitkroh u la iakynduh ruh ia u Lat ka jylla dang shen u Dr KK Paul bad ha kane ka jingkynduh u Lat u la niat ba kane ka Bill ka don ha kti ka sorkar.