2 lak thong ki pulit ban ai jingtip ia u commander-in-chief ka ASAK

Shillong, 12 ’lyngkot:
Ki pulit ka Meghala-ya ha kane ka sngi Palei ki la pynlait paidbah ia ka dur jong u commander-in-chief ka ASAK u Reding T. Sangma da kaba thong ban ai buskit T. 2 lak ia kiba pyntip ne ai jingtip shaphang jongu.
“Mano mano ba ai jingtip shaphang ka jaka ne ka jingdon jong u Reding T. Sangma yn ai buskit T. 2 lak da u Superintendent of Police ka South Garo Hills”, la ong u Anand Mishra u SP ka district.
Ka kynhun kiengatiar ka ASAK ka treikam bha ha ka thain South Garo hills district bad ka la leh bun ki kam beain bad ki kam pyntriem hadien ba la kham kynjah ka Garo National Liberation Army (GNLA) bad kiwei ki kynhun.
Ha kane ka sngi Hatmajai, ki nongkhaii na thain Dalu kila shah rahbor haduh lai ngut ha kine suba jong kane ka seng kiengatiar na Telekhali kaba don ha khlaw markhapd bad ka Bangladesh.