Iaknieh EM, 2 ki MDC ka KHNAM, ym pat ai kyrteng sha u CEM

Shillong, 11’lyngkot:
KI lad khubor ki la iathuh ba ka la jur bha ka jingiaknieh long Executive Member ha KHADC hapdeng ki 2 ngut ki MDC ka KHNAM kata hapdeng u bah Adelbert Nongrum MDC ka Jaiaw bad u bah James Ban Basaiawmoit MDC ka Mawkhar. La iathuh ruh ba u CEM ka KHADC u la pan na ka seng KHNAM ia ka kyrteng jong uwei na ki MDC jong ki ban long kum u EM, hynrei haduh mynta katei ka seng kam pat lah ban phah ia katei ka kyrteng.
Haba ia kren bad u bah Adelbert Nongrum u la kubur ba u CEM u la pan kyrteng na ka KHNAM iano kan phah kum u CEM hynrei u la ong ba haduh mynta ka KHNAM kam pat phah ia ka kyrteng, “Ngim da sngew donkam eh ia ka shuki EM, wat la ha kawei ka liang ka long kaba donkam hynrei ngi kwah ba nyngkong hi ban pynurlong ia ka nongrim ba ngi dawa” ong u bah Adelbert da kaba kdew ba ka KHNAM nyngkong eh ka kwah ba u CEM un pynurlong ia ka jingdawa jong ka ban pynbeit thymmai ia ka A.D Rules kata ia ka kyndon kaba 128.
La kylli biang hato ka don ne-em ka jingiaknieh ia ka shuki EM hapdeng ki ar ngut ki MDC ka KHNAM kumba la saphriang ki khubor u bah Adelbert u la ong “Ka lah ban long na kyndong kyndong, hynrei ngim tip pat haba shai”.
Lah ban kdew ba u bah Adelbert u la dawa na u CEM ba u dei ban ai ha u ia ka kam EM bad un bat ia ka tnad khaii pateng tang hynriew ruh bad un sa pyni ia ki kam hynrei ki lad khubor ki la iathuh ba uwei pat u MDC ka KHNAM u bah James Ban Basaiawmoit u la byrngem ia u CEM ba um dei ban ai lym kumta un pynkhih ia ka shuki jong u. Ki lad khubor ki la iathuh ba katei ka jingkren ki ar ngut ki MDC ka KHNAM ka la pynkingkhlieh ia u CEM kaei ba un leh bad kaei ba un ym long ban leh.