Mynsaw 14 ngut, ba bret bom u suba ULFA(I) ha Paltan Bazaar

Guwahati, 28 Naitung:
Uwei u lehnoh uba la suba ba lah ban dei u dkhot ka kynhun ULFA(I) mynta ka sngi u la bret da u bom Grenade hapdeng ka iew Paltan bazaar ha kaba 14 ngut ki briew ki la mynsaw jur na katei ka jingjia. Katei ka jingjia ka la jia ruh ha syndah jong ka Paltan Bazaar Police Station. Utei u lehnoh u la wan sha katei ka jaka da ka thuk thuk.
Haba kren sha ki nongthoh khubor u Anand Prakash Tiwari SSP Guwahati, u la pyntip ba kane ka dei ka jingpyn triem ba ki kynhun lehnoh ki ju pyntriem ia ki paid bah ha kaba ki ju leh ruh ia kum kitei ki jait kam ha ka por mynmiet. U la ong ruh ba utei u lehnoh uba la pynbthei bom hangtei u la lah ban dei u dkhot jong ka ULFA(I) hapoh ka jingialam jong u Paresh Barua. U SSP u la ong ruh napdeng 14 ngut kiba la mynsaw tang ar ngut ki dei kiba la mynsaw jur.
Lah ban pynkynmaw ba ka jngpyntriem jong ka ULFA(I) ka la sdang naduh ka taiew kaba la dep kum ka jingpyrshah ruh ia ka jingthmu u Myntri Rangbah ka Assam u Tarun Gogoi ban leit sha South Africa. U Tarun Gogoi haba kren sha ki nongthohkhubor u la ong ba ki pulit ka jylla mynta ki la pynkhreh bha ban ap pahara ba kan ym mih kano kano kaba kum katei ka jingjia ha ka sngi rakhe laitluid ka jylla lane shuwa katei ka sngi.