Shah kem sa u rangbah na Wahkdait, poi sha ka 9 ngut kiba shah kem

Shillong, 10’lyngkot:
Haduh mynta ka la poi sha ka 9 ngut ki nongshah kem ha ka jingjia kaba ia dei bad ka jingshahbat lok jubor ka khynnah 14 snem. Mynta ka sngi ki pulit ki la kem ia uwei u rangbah briew ba la 66 snem karta na ka shnong Wahkdait kaba don sharum Pynursla. Utei u rangbah u dei uba la tip kyrteng kum u bah Kentely Tangsang.
La kem ia u halor ka jingkynnoh ba u la lehbor ia katei ka khynnah 2 sien ha ing jong ka Mary ha Demthring. U bah Kentely u dei u paralok jong ka briew kaba khaii kynthei ka Mamoni. U SP (City) u bah Vivek Syiem u la ong la rejistar ia u bah Kentely ha Madanrting PS.
Lah ban kdew ba ka State Commission for Protection of Child Rights (SCPCR) ka la ujor ejahar, pyrshah ia ki briew kiba katei ka khynnah ka la phla bad haduh mynta kiba la shah kem ki long 9 ngut kynthup u bah Julius Dorphang MLA ka Mawhati bad kiwei pat. Kiwei pat kiba la shah ujor ejahar bad ki pulit, ki dang wad, ki long u Hasan u mahajon tin jot uba la shah kynnoh ba u batbor hapoh dukan jong u, u Khasi na Borsora (uba shah kynnoh batbor ha kawei ka hotel ha Khyndailad), u Hosor, u nongpyniaid tim, u Apu na jowai bad u Sagar uba la wanrah da u shipai sha ing ka kong Mamoni.