Ngam pat ioh shithi beh seng: Pyniaid

Shillong, 10 ’Lyngkot:
U MDC ka Sohryng-kham u Bah Pyniaid Sing Syiem, u la ong ba haduh mynta um pat ioh pdiang satia ia ka shithi sospon ne beh seng na ka HSPDP, watla ka party ka la pyn-bna ba ka la sospon ia u naduh kham mynshwa.
Ha ka pyntip jongu halor kane, u Bah Pyniaid u la ong, “Haduh mynta ngam pat ioh ia ka shithi beh seng”.
Ha ka jingshisha, u General secretary ka HSPDP u Bah Witting Mawsor lem bad kiwei ki nongialam ha ka taiew ba la dep, ki la pynbna paidbah ba ka party ka la rai ban sospon ia u Bah Pyniaid haduh ar snem halor ka nongrim ba u la ialeh pyrshah ia ka party khamtam ha ka elekshon MDC shiteng samoi kaba dang shu dep shen ha u bnai ba la dep.
Hynrei katkum ka jingong u Bah Pyniaid, ka party kam pat shym la phah shithi eiei ne pynpoi ha kti jongu ba la beh seng. Lada ki beh seng ne sospon, kum ka party ka dei ban pynpoi ia ka shithi ha u ba un ioh ban
pynshisha hynrei kumba ka long haduh mynta, ka jingsospon, ka dang long tang ha ka jingpynbna ha ki lad pathai khubor.