Ka thup kyrteng ki nongthep vote ha East bad West JH

Jowai, 10 lyngkot:
Ia ka thup kyrteng ki nongthep vote na ka bynta 1-Nartiang, 2- Jowai, 3-Raliang, bad 4-Mowkaiaw Assembly Constituency la pyllait paidbah bad la sam sha ki seng sain hima bapher bapher ha ka jingialang kaba la long mynta ka sngi ha DC Office ha Jowai. Ha kane ka thup ki kyrteng jong kito ki samla kiba la ioh rung thymmai ha ka thup kyrteng ki nongthep vote ruh ki la don.
Ha ka jingialang la donlang u Additional Deputy Commissioner, u ma SC Laloo, u bah DM Wahlang, ADC, bad u Extra Additional Commissioner, u bah BJ Kharshandi ruh u la donlang.
U bah Kharshandi u la iathuh ba ka jngdon ki nongthep vote ha kitei ki 4 tylli ki Constituency ka la kiew haduh 3517. Ha Nartiang-937ha Jowai, Raliang – 1023 bad ha Mookaiaw Constituency da  879 ngut. Ka jingdon ki nongthep vote ha kitei ki saw tylli ki Constituency ka la to 1, 24,319 katta 59,745 ki shynrang bad 64,574 ki kynthei.
U bah Kharshandi u la iathuh ruh ba kum shi bynta ka jingrakhe iaka National Voters Day ha ka 25 tarik une u bnai, ka Ophis jong u DC Jowai ka la pynkhreh ban pynlong iaki program bapher bapher bad ka mat pdeng ka “Empowering Young and Future Voters” . Kane ka program kan sdang naduh ka 17 tarik une u bnai.
Ha katei ka program kan don ka iakop thoh essay, halor ka phang – “Youth are the Driving Force towards a Vibrant Democracy”, ka jingiakop tainia halor ka phang “India’s Vision for a strong Democracy relies solely on the Youth today” bad kiwei kiwei kum ka jingiakop rwai, ka iakop pynher kot kudi bad ka Seminar.
Kan don ruh ka jingpynkup burom ia ki samla kiba la ioh ban thep vote nyngkong eh ha ka 25 tarik une u bnai. Kan don ruh ka jingialehkai phutbol. Kiba kwah ban iashim bynta ki lah ban phah ia ki kyrteng jong ki shynrang bad kynthei sha u bah HML Kynta EAC lane phone ha u No.  9856060590.
Ha kane ka juh ka sngi, u ADC ka East Jaintia Hills uba dei peit ia ka tnad Election, u bah SS Syiemlieh u la pyllait paidbah iaka Electoral Roll na ka bynta ka 5-Sutnga bad 6 – Khliehriat Assembly Constituency.
Na ka liang ka Election Ophis ka la khot ia ki nongmihkhmat da ki Seng Sain HIma bapher bapher ban wan mih sha DC Ophis ban ioh sam ia kitei ki Electoral Roll, hynrei ym don satia ba wan.
U bah Syiemlieh u la pyntip ruh ba ha East Jaintia Hills ki don haduh palat 2000 ngut ki briew kiba don jingduna ha ki dkhot met bad na ka bynta jong ki, ka bor pyniaid election kan pynlong ia ka Special Camp na ka bynta ban pynioh ia ki ia ka hok thep vote.