“Ngim kwah ba u briew, uba don jingma ia ka jaitbynriew un long CEM”

Shillong, 9’lyngkot:
Tang mar ia dep bam smai ki MDC thymmai ka KHADC, kiba dang shu jop ha ka elekshon MDC shiteng samoi kaba la long ha u nohprah jong u snem ba la dep, ki MDC ka seng HSPDP wut wut ki la leit ban ai jingkyrshan ia ka PDF ban pynneh ia u KHADC u bah Pynshngaiñ N Syiem kum u Chief Executive Member ka KHADC.
Katei ka jingleit kyrshan PDF ka HSPDP ka la pynsah ia u paidbah ha ka umdum naba ka nongrim jong ka jingleit kyrshan jong ka kam da sa shai khamtam ba katei ka seng ka dei kawei na ki seng kaba pyrshah bha ia ka rukom treikam ka EC ha KHADC hapoh ka jingialam u bah Pynshngaiñ ha kaba la iohi ba watla baroh ki MDC ha ka KHADC ha ki khyndiat por ba la dep ki la don lang hapoh katei ka kynhun, la iohi pat ba ki MDC ka HSPDP ha kato ka por kata u bah Pyniaid Sing Syiem bad ka kong Teilinia Thangkhiew ki la pyneh triang bad ki shong ar ngut ha ka liang pyrshah.
Dei mynta ka sngi ba ka nongrim jong ka jingleit kyrshan PDF ka HSPDP ka la shai hadien ba u nongialam ka Media Cell katei ka seng u bah Londoner Sohtun ha ka jingkren jong u sha ki nongthohkhubor u la ong ba ka jingleit kyrshan ka dei beit tang ha kawei ka nongrim kata ban khanglad ia u bah H.S Shylla (u MDC ba dang shu shah jied na Nongkrem konstitwensi) ban shong ha ka shuki CEM bad u la ong ba u bah Pynshngaiñ u tip bha ia kane.
“Ngim kwah ba u briew uba don jingma ia ka jaitbynriew un leit ban shong ha ka shuki CEM, kumta ngi leit ban pynskhem kumta ngi leit ban kyrshan ia ka PDF” ong u bah Londoner Sohtun haba ia kren bad ki nongthohkhubor. Haba kylli kiei kita ki jingma lada jia u bah Shylla un leit ban shong ha ka shuki CEM utei u nongialam jong ka Media Cell ka HSPDP u la ong ba ka dawbah ka dei ka jingtih Uranium.
Haba la kylli na u aiu u don ban ong haba u Shylla u la kren shai ba ka kam tih Uranium ka la kut bad ym donkam shuh ban khyllie ia kata “Ngi hap ban leh ha ka por kaba biang shuwa ba kiei kiei kin jia” u la jubab.
La kylli biang hato nalor ka nongrim ban khanglad ia u bah Shylla kiei dei ki nongrim ba ka seng HSPDP ka leit kyrshan ia ka PDF, utei u nongialam HSPDP u la ong ba ka dei tang katei hi kawei ka nongrim ba ki MDC ka KHADC ki leit ai jingkyrshan ia ka PDF.