Ka don ka jingiapyni bor, kaba jur bha, ha ka nongbah Cairo mynta ka sngi bad katei ka dei hadien ba ki bor shipai, ki la hiar thma bad ialeh pyrshah ia ki nongkyrshan jong U President barim jong ka Egypt, U Mohammed Morsi hynnin ka sngi.
Haduh mynta ka sngi, ki maw it kiba ieng ban ker sawdong ia ka surok bah ha Nasr, ki dang ieng kynjreng, kaba dei ka nongbah ba sha mihngi jong ka Egypt, kaba pyni, ba katei ka dei ka dak jong ka jingialeh pyrshah hapdeng ki bor shipai bad ki riew paidbah.
Ka jingialum paidbah mynta ka sngi, ka long ka dak jong ka jingsngew pyrshah, halor ka jingshah siat jong ki riew paidbah, kiba ia lum lang hynnin ka sngi, ha shwa ka por ia duwai mynstep, ha kaba la iathuh ba ki pulit, ki siat da kaba thew beit na khlieh bad na shadem jong ki nongialeh pyrshah.
Ha katei ka jingshah siat, ki nongkyrshan jong U Morsi, ki la ialeh pyrshah bad ki pulit, da kaba ki ia lum paidbah, ki ia kawang da ki maw bad ki rieh ialade ha ki mawit, ba ki la ker skhem bha.
Ki don ruh da ki hajar ngut kiba rieh ialade, ha kawei ka iingmane jong ka nongbah Cairo bad ki don sa shibun kiba mynsaw, ha ka jingiasiat ha ki surok bah bad ka snam ka la lyngkien bad ki don bun bah, kiba la leit ialam mar mar sha Hospital bad wat ki met iap, ki don bun bah, kiba dang sah teng ha surok bah.
Na ka liang ki nongialeh pyrshah, ki la rai ba kin nym pyndem satia bad ki dawa, ba dei ban thung biang ia U Morsi, kum U President jong ka Ri, uba la shah weng jubor, ha ki shipai ha ki khyndiat taiew ba ladep bad mynta u don ha ka jingshah kem, ha kaba ki bor shipai, kin sa tian bishar ruh ia u.
Don ki lad khubor, kiba iathuh ba ki don haduh 200ngut ki riew ialeh pyrshah, kiba la iap naduh hynnin ka sngi, wat la ki lad khubor sorkar, ki iathuh ba ki don 72ngut.
Katei ka jingjia, ka la pynmih ia ka jingkhie bitar jong ki ri ka pyrthei, ba kynthup ia ka England, ka America, ha kaba la shim ba ka dei ka jingjia kaba jubor tam, naduh ba ka don ka jingialeh pyrshah, ha ka por ba iakhih pyrshah ia U President ba rim, U Hosni Mubarak.
U Secretery kam poh iing jong ka America, U Chuck Hagel, ula kren ia u nongialam jong ka kynhun shipai, U Abdel Fattah al-Sisi, uba don kti ban wer ia ka sorkar U Morsi, ha ka 3tarik Naitung 2013.
La iathuh ba ki shipai, ki siat naphang ia ki briew, kiba dang mih na kawei ka iingmane, ha ka step sngi saitjain bad ki khang lynti ia ki ba kin iaid ha ki bynta ba don sha mihngi jong ka Cairo.
U doktor, u iathuh ba ha ki hospital, kiba don ha kitei ki jaka iakhih, ki la khapngiah da ki met iap suda, ha kaba u iathuh ba u lap ia 38tylli ki met iap bad sa shibun kiba mynsaw. Na ka liang ka tnat kam poh iing, ka kam ba ki la pyndonkam tang da ki lyer pynsatkhmat bad ki iathuh ba ki don 14ngut ki pulit bad 37ngut ki shipai kiba la mynsaw.
Na ka liang jong ka Al Jazeera Egypt, ka kam ba kumba 4,500ngut ki briew, ki mynsaw, ha katei ka jingialeh pyrshah jong ki shipai bad ki riew paidbah hynnin ka sngi.
Phi don ban ong eiei?