Ka HSPDP ka seng beh briew? 3 ngut ki MDC ba la shah beh

Shillong, 4’lyngkot:
Hadien ba beh seng da kaba sospon ar snem kynthih ia u bah Pyniaid Sing Syiem-MDC ka Sohryngkham konsti-twensi, ki nongialam ka HSPDP ki la kren shai ruh ba u bah L.G Nongsiej MDC ka Nongstoiñ bad u bah Morningstar Mawsor MDC ka Mawshynrut kim dei shuh ki dkhot jong katei ka seng. Ia kane la kren shai da u MLA katei ka seng na Nongstoiñ konstitwensi u bah Diosstar Jyndiang haba kren sha ki nongthoh-khubor.
Bun ki jingiakren ki la mih halor ka jingbeh briew ka seng HSPDP ha kine ki khyndiat por ba la leit, katei ka jingbeh briew ka la sdang naduh ka jingshah beh seng ka kong Fenela L Nonglait (ha ka por ba dang im u bah Hoping), nangta sa u bah L.G Nongsiej bad bah Morningstar Mawsor, ka la don ruh ka jingiakren halor ka jingshah beh seng u kyrtong barim jong ka na Mairang u bah Counsellor Wahlang.
Shuwa ia kane ka kong Gracemary Kharpuri MDC ka Nongshken ka la phet seng bad mynta pat shah beh sa u bah Pyniaid Sing Syiem. Haduh mynta tang ki MDC ki la don haduh 3 ngut kiba la shah beh seng lait noh ka kong Grace kaba la phet hi.
U bah Jyndiang haba kren sha ki nongthohkhubor u la ong ba ka jingshah beh ki MDC bad ki nongialam jong katei ka seng ka dei namarba ki leit ia soh noh sha kawei pat ka kynhun khlem da kynjoh ktien na ka Party bad katei ka jingleh jong ki ka long pyrshah ia ka riti synshar jong katei ka seng.