Pynrem ka KSU, na ka bat bor kynthei

Nongpoh, 04 ’lyngkot:
Da kaba sngewkhia halor ka jingshah khaii bein jong kawei ka khynnah sha ka kam awria, kaba dang jia shen ha Marvelene’s Inn, mynta ka sngi ka Khasi Students Union, North Khasi Hills District, ha Ri Bhoi District, ka pynpaw ia ka jingsngewkhia halor katei ka jingjia bad pynrem jur ruh ia kito kiba donkti ha katei ka kam beain, kaba long pyrshah ia ka hok longbriew man briew.
Kumban shu pynkynmaw hangne, katei ka khynnah kaba dang 14 snem ka la shah khaii beain na ka bynta ban pyndonkam ha ki kam Awria ha Marvelene’s Inn kaba don ha Nongbah Shillong bad halor katei ka jingjia la donkti da ki riew pawkhmat, ha kaba kumba ka la paw pyrthei ba wat u Bah Julius K. Dorphang, MLA ka Mawhati Constituency u la donkti ban leh kam awria jubor bad katei ka khynnah 14 snem.
Halor jong katei ka jingjia, na ka liang u samla Ferdynald K. Kharkamni, President ka KSU North Khasi Hills District Unit, u la ong ba ka seng hi ka pynrem jur ia kiba donkti ha katei ka kam khaii bein ia ki kynthei bad khamtam eh ia u Bah Julius K. Dorphang, uba dei u nongmihkhmat paidbah, ha ka jaka ba un long u ban iada ia ka jingshah lehbeiin ki kynthei, hynrei u dei pynban uba donkti ban leh ia katei ka kam, kaba long pyrshah ha ka imlang sahlang.
Kumta haba iadei bad katei ka jingjia, ka seng ka dawa ruh ia ka sorkar ba kan pynlong ia ka jingtohkit kaba kylluid, khnang ba baroh kito kiba donkti ha katei ka kam kaba long pyrshah ia ka hok ki kynthei ba kin ngat ki kyndon ain, khnang ba kan wanrah ia ka jingshngain jong ki kynthei hapoh ka jylla, u la bynrap.