Khyllie biang ka PAC ia ka bamsap khlaw Mawpdai

Shillong, 4 ’lyngkot:
Ka Public Accounts Committee (PAC) ka iing dorbar ka la khyllie biang ia ka bamsap ka tnad khlaw ha Mawpdai, R-bhoi hadien ba kane ka kam ka la thap pynjah rngai noh.
U chairman ka PAC u Bah Paul Lyngdoh u la ong ba ka tnad CID ka la pynbiang ia ka jingtohkit bad kan sa aiti ia ka kaiphod jong ka jingtohkit ha u bnai ban wan.
“Ki pulit ki la pynthikna ba kin pyndep ia ka jingtohkit bad ban aiti ia ka kaiphod ha kaba kut jong u bnai Rymphang”, la ong u Bah Paul Lyngdoh hadien ba la wai ka jingialang ka PAC hynne ka sngi.
Ka PAC ka la bthah ia ka tnad pulit ban aiti ia ka jingiaid ka jingtohkit man u bnai khnang ban pynsted ia ka jingtohkuit halor kane ka jingkynnoh bamsap.
Ia ka jingtohkit la sdang naduh u snem 2012 hynrei haduh mynta khlem pat dep hynrei kane ka kam ka la khih biang hadien ba la tuklar ka PAC ha u 2016.
Halor ka bynta kaba don ha iing kashari, ka PAC ka la bthah ia ka tnad khlaw ka jylla ba kan leit buddien khnang ban pynbeit ia ki jaka ba la dep siew haduh T. 8 klur.
Ka tnad khlaw ka jylla ka la pynlait ia ka pisa haduh T. 8 klur sha u MLA barim ka Umroi u Bah SW Rymbai na ka bynta ka jaka ha Mawpalai kaba heh 1.78 sq km.