Kurup kyiad ki Seng Longkmie, Samla bad HNYF na Nongpoh

Nongpoh, 29 Nohprah:
Da ka jingthmu ban rat dyngkhong ia ka jingdon jong ki dukan kyiad kiba die beain ha ka sor Nongpoh, mynta ka janmiet ka kynhun jong ki Seng Longkmie ha ryngkat ka jingiatreilang ki Seng Samla Shnong Nongpoh bad ka seng HNYF, ki la pynlong ia ka jingkhynra kyiad ha ki katto katne tylli ki dukan, ba la suba ba ki ju mlien ban die beain ia ka kyiad bad ha kane ka jingkhynra ki la ioh ruh ban kurup da ki spah Litar ka kyiad phareng bad kyiad pyrsi na ki lai tylli ki dukan die kyiad beain.
Ki dukan kiba la ioh ban kurup, ki kynthup na ka dukan jong ka Kong Ibakordor K.Jahrin, na ka dukan u Bah Julius Phawa, hynrei la lap tang ia u nongtrei u Paulstar Basawiamoit bad na kawei ka dukan kaba ym don kiba kam trai, hadien ba ki la ioh ban kem ki Seng Longkmie bad Seng Samla, kila rah ia ka kyiad sha ka Iing Durbar bad hadien kane ki la shimia ka rai ban theh noh shisyndon ia baroh katei ka kyiad kaba ki la ioh ban kurup sha madan.
Haba iakren bad ki nongthohkhubor, kitei ki nongialam Seng Longkmie kim lah khlem da pynpaw ia ka jingsngewkhia halor ka jingjyllei jong ki dukan kiba die beain ia ka kyiad ha Nongpoh, namar kane ka jingbun jong ki dukan kiba die kyiad ka wanrah ruh ia shibun ki jingsniew bad khamtam eh ka jingngop jong kito ki khynnah kiba dangkhie.
Ki la pynpaw ruh ia ka jingsngewlyngoh halor ka jingbym shimkhia da ka tnat Excise, kaba dei peit halor ka kam die beain ia ka kyiad, ki la bynrap ruh da kaba ong “Shwa jong kane ka jingleit ban khynra, ka la don ka jingkhynra na ka tnat Excise, hynrei ka long pat kaba sngew lyngoh ba kumno kat kita kiba la trei na ka bynta ban khynra ia kiba die kiad beain kim lap, hynrei lap pynban da mangi ki bym nang ei ei bad kane ka lah ban don kaei re kaei sha lyndet” ko la ong.
Kumta na ka liang ki Seng Longkmie, Seng Samla bad HNYF, ki la maham ia baroh kito kiba mlien ban die beain ia ka kyiad ba ki dei ban sangeh shi syndon bad ba ki dei ban leh noh da kiwei pat ki jait kam, ha kajuh ka por ki la ther ruh ia ka jingleh mynthi da ka tnat Excise namar ka jingbym treihok katkum ba la pynkup bor ha ki, ki la bynrap.