Naduh u Risaw la dei ban ioh DA ki nongtrei sorkar, ong ka UDP

Shillong, 27 Nohprah:
Ka UDP ka la sngew kyndit ba ka sorkar jylla kam pat pyllait ia ka Dearness Allowances (DA) jong ki nongtrei sorkar haduh mynta ka sngi. Ha ka jingshisha, ka por ka la dei ia ka sorkar ba kan pyllait ia ka ha u bnai Risaw.
Haba pynpaw ia ka jingsngew kyndit halor kane, u Vice President ka UDP u Bah Allantry Franklin Dkhar u la ong, “Ka long kaba sngewsih ban tip ba ki nongtrei sorkar jylla ki la shah leh bein ha ka sorkar ha kaba ka DA jongki, kaba dei ban pyllait ha u bnai Risaw kim pat ioh satia haduh kine ki sngi”.
“Kane ym tang ba kan pynpjah ia ka mynsiem rakhe ia kane ka aiom lehkmen hynrei kan pynlong ruh ia ki ban buh jingeh ha kum kane ka aiom kaba donkam namar ba bun ki nongtrei barit ki shaniah ha ka DA. Ka sorkar ka sorkar ka dei ban pynthikna ban weng noh ia kane ka jingeh wut wut”, la ong ka UDP.
Lah ban kdew ba ka sorkar jylla kam pat shym la pynlait haduh mynta ia ka Dearness Allowance (DA) jong ki shakri sorkar ha ka jylla kaba dei ban pynlait man ka hynriew bnai.
La iathuh ba ka DA kaba ka sorkar ka la dei ban siew hynrei khlem pat siew haduh mynta sha ki nongtrei sorkar ka la kot kumba T. 35 klur eiei. Kane jingbym pat pynlait ka sorkar khamtam ha kum kane ka aiom Khristmas ka la pyndukha mynsiem ia ki nongtrei kiba la ap khmih lynti ban pyndonkam ha kane ka aiom lehkmen na ka bynta ka iing ka sem.