Ka jingshah rem ka BJP ha ka MDC, ka dei ka jingsdang, ong u Naik

Shillong, 22 Nohprah:
U Myntri khyn nah ka sorkar pdeng uba dei u nongialam ka BJP u la ong ba jingshah rem ka BJP ha kane ka elekshon MDC shiteng samoi, kam da pher than namar ba ka dang dei tang ka jingsdang.
Haba jubab halor ka jingkylli ka jingshah brut lut ki kyrtong ka BJP ha kane ka elekshon ba dang shu dep shen ha ka KHADC bad JHADC, u Naik u la ong, “Ka dei tang ka jingsdang, ngin sa peit hadien”.
Katkum ka jingkren jong u myntri ka BJP Meghalaya ka donkam ban trei shitom kham bun nangne shakhmat ban poi sha ka thong.
Ha kane ka elekshon MDC ba dang shu dep, baroh 7 ngut ki kyrtong ka BJP kim shym la poi sha ka thong bad baroh lait noh tang u kyrtong na Mairangba ioh vote bun hynrei kiwei ki shu lait brut ha ka jingioh vote jongki.
U Naik uba la wan ban plie ia ka North Eastern Institute of Ayurveda and Homoeopathy (NEIAH) hynne ha ka Mawdiangdiang la iohi ba la wan lang u president ka BJP u Bah Shibun Lyngdoh bad kiwei ki nongialam kane ka seng.
U President ka BJP Meghalaya u Bah Shibun Lyngdoh u la ong ba ka elekshon MLA ha ka jylla kan sa wan sa shi snem tam bad kyrmen ba ki paidbah kin sa sngewthuh ia ka BJP.
Haba kren hadien ba la shah kput ha kane ka elekshon MDC shiteng samoi, u Bah Shibun u la ong ba ka jingbym poi ki kyrtong ka BJP ha kane ka elekshon ba dang shu dep, kam dei u diengpynkiang ia ka lynti iaid ka party ha u 2018 ha kane ka jylla.
Kham mynshwa,  u Bah Shibun u la kynnoh ba kiwei ki party khamtam kiba la don ha ka bor, ki thied da ka pisa ia ki paidbah bad kiwei ki buit jongki, ban pynshit ia ka BJP ba ka pyrshah Khristan kum ka jingpynbna ia ka Good Governance Day kaba ka party kam pat ioh ban pynshai bha bad kawei pat ka dei ka jingther ki party ba ka BJP ka don ha NEDA bad kam myntoi ban jied ia ka, bad ka bha ban jied beit ia ki party riewlum ba don lang.
U la ong ia ka mat elekshon ka party ruh ki paidbah kim pat sngewthuh bad ki dang don ka jingsngew ia ka BJP da ka jingpynshit bad ialam bakla kiwei ki party. “Ia ka mat elekshon ka party, kam dei ba ki paidbah kim pdiang hynrei ki dang shah pynsngewthuh bakla ha ka jingpynshit jong kiwei ki party da kiwei ki mat kum ka jingkynnoh ba ka BJP ka dei kaba pyrshah Khristan, kaba ha ka jingshisha kam dei satia kumta”, u la ong.
Ki 7 tylli ki MDC konstitwensi kiba ka BJP ka la pynieng, ka long na Mairang, Pariong-Mawthadraishan konstitwensi, Rambrai, Nongkrem , Sohiong-Nongspung  kiba hap ha KHADC bad na War East ka JHADC.