Ka Nan Polok ka dei kawei na ki jaka shongkai pynngad jong ki briew kynthup naduh kiba rit haduh ki tymmen pynban ka long ka jingpynwit namar la ju don ka jingleh khlemakor hapoh ka park ba la ju lap da ki nongtrei kiba peit ia kane ka park.
Kaba kham sngew phylla ba ju lap hapoh kane ka park ka long ba dei ki trai shnong kiba ju leh khlem akor. Bunsien ki briew haba ki wan rung hangne hapoh ha ka jingshisha, ba kin wan iaid kai pangngad hynrei ki ju leh da ki kam khlemakor ha kaba ki ju pynlong da ka jingiadih iabam hapoh ka park haduh ba ki nongpeit teng teng ki isait met ban peit khamtam ki khynnah bad rangbah.
Katkum ka jingia thuh u heh jong katei ka tnad Forest, la ju lap bunsien ia kum kitei ki kam khlem akor ha katei ka park bad dei na kane ka daw ba ka tnad Forest kala ju iatreilang bad ka tnad jong ki Police ban trei naphang lada lap ia kum kitei ki briew ki ba leh khlemakor. “ki briew jong ngi ki long khlemakor bha haba ki wan rung hapoh hynrei kaba sngewtynnad ka long ba ki briew ki ba wan nabar jylla ki kham don akor bad ki burom bha ia ka rukom pyniaid haba ki rung hapoh kane ka park”, la ong uwei na ki heh Forest uba dei peit ia kane ka park.
U la iathuh ruh ba ki la don ka jingmut bala don ka jingtyrwa ba kin buh noh da ka CCTV hapoh kane kane ka park khnang ban pynsuk ban lap ia kito ki bal eh ia ka kam khlemakor. Kane ka CCTV kan long ruh ka jing pyntieng ia ki briew khnang ba kin nym leh shuh ia ki kam khlemakor kiba kthah ia ka burom akor.
” ngi la pyrkhat ban buh noh da ka CCTV hapoh kane ka park khnang ban pyntieng ia kito ki briew ki ba wan leh ia ki kam khlemakor”, u la ong bad u la bynrap ba ki nongtrei ki shem jingeh ban lap ia kito ki briew ki ba leh ia kitei ki kam namar ba katei ka park kam don jingker kaba biang.
Ha kajuh ka por ula iathuh ruh ba na ka liang jong ka tnad Forest ki la don ka jingthmmu ban ker kynroh jrong sawdong hapoh katei kapark hynrei la mih ka jingpyrshah da kaba ai daw ba ka dei ka jaka paidbah bad ka jingthmu jong kane ka tnad ka la shu sahkut noh.
Lah ban kdew hangne kane ka tnad Forest ka la iohlum na ka T.7 lak sha ka T.18lak tang hapdeng kine 11 snem.
Tang mynta u snem 2012-2013 ki nongwan rungkai ha kane ka nanpolok ki poi 8,33,28 ngut ki briew kynthup lang naduh kiba rit haduh kiba heh ba san.
Kane ka Nan Polok kadei ka ba la seng da u William Erskine Ward ha u snem 1893-1894 bad ka jingheh jong kane ka nanpolok kadei 6.28 hecteres.
Ha u snem 2001 ka tnad Forest & Environment ka la shimti ban pyniaid ia kane ka park.Ka tnad Forest ka peit tang ia ki ba iadei bad ka jingpynkhuid ia katei ka park bad ia ki syntiew ki sku, katba ia ka jingshonglieng bad ka dukan bam la peit da ka tnad jong ka Tourism Development Corporation.
Kane ka Nanpolok na u bnai Lber haduh u bnai Risaw ka por plie jong ka ka long naduh 8:30 mynstep haduh 6:30 janmiet, ha u bnai Naiwieng haduh u Rymphang ka plie 8:30 mynstep haduh 4:30 janmiet lait noh ha ka sngi baar ki khang.
Phi don ban ong eiei?