Rem bym kitkhlieh ki nongialam:HSPDP

Nongstoin, 22 Nohprah:  Ki nongkyrshan ka HSPDP ki la kynnoh ba ka dawbah jong ka jingshah rem katei ka seng ha ka elekshon MDC shiteng samoi ka dei namar ka jingbym kit khlieh ki nongialam jong katei ka seng. Ka jing sngewlyngngoh ki nong kyrshan katei ka seng ka dei khamtam eh ha Nongkrem konstitwensi bad ha Rambrai konsti twensi –ka konstitwensi ba ki don ia ki MLA jong ki ha kaba u bah Ardent M Basaiawmoit bad u bah K.P Pangniang kim shym la lah ban pynjop ia ki kyrtong jong ki.
Uwei u nongkyrshan jong katei ka seng u bah Budstarlin Wanniang na Nongstoiñ u la ong ba katei ka dei namar ba ki nongialam katei ka seng kim don ia ka jingkitkhlieh bad ki dei ban shim ia ka jingkitkhlieh jong ki halor katei ka jingshah rem da kaba hiar shuki noh na ka kam nongialam Party.
“Lada ka party HSPDP kam ioh ia ki nongialam kiba bit ba biang khlem pep ba ka party ha ka jaka ba kan nangkiew kan hiar arsut kylla namar ba kiba bun ki paidbah nongkyrshan kim hun shuh ia ka rukom treikam bad rukom pyniaid kam jong ki nongialam ba ha khlieh duh jong ka party” ong u bah Wanniang. Shuh shuh u la ong ruh ba ka jingshah beh bad shah kyntait noh jong ki dkhot bad nongkitkam ka party HSPDP na Mairang ha u President ba rangbah duh jong ka party kala ktah haduh katta kata ia ka party.