Pynshai U Nicodemus ba shah kynnoh thied masi tuh

Shillong, 19 Nohprah:
U Bah Nicodemus Majaw u la kyntait ia ka jingkynnoh u President ka seng nongotdoh masi ka Khasi Jaintia Butchers Welfare Association (KJBWA) Bah Generous Warlarpih ba u ju leit thied masi tuh na Khanapara, Ri-Bhoi.
Haba pynshai halor ka jingshah kynnoh, u Bah Majaw u la ong ka jingkynnoh jong u Bah Warlarpih ba thied masi tuh ka dei tang ka jingthmu ban pynjah burom. “Ngam dei satia u dkhot ka KJBWA kumba la paw ha kot khubor bad ngam don bynta eiei ban rai pynsangeh thied masi na iew Khanapara”, la ong u Bah Majaw haka jingpynlait khubor.
U la ong ruh ba um don bynta eiei ban kyrshan ban rah ia ka iew masi na Khanapara sha Byrnihat.
Haba iadei bad ka jingkynnoh leit thied masi tuh, u bah Majaw u la ong ba u khlem leit thied masi tuh na iew khanapara kumba la kynnoh hynrei u shu leit synran ia u hymmen jongu, u Bah Yelloy Majaw uba ju khot Bah Lung.
“Na ka bynta u hymmen jong nga, nga ju synran ia u ban thied masi na iew Khanapara bad u hymmen jong nga um shym la thied tuh, hynrei dei na ka bynta ban shohdoh ban die ha iewduh, ym ban khaii tuh. Ia ki masi ruh la buh marka L.M’, la ong u Bah Majaw.
Lah ban kdew ba dang shen, ka KJBWA ka la pynrem jur ia ki lai ngut ki dkhot jongka, kiba la kynnoh ba ki pynkhein ia ka rai ban sangeh thied masi na Khanapara.
U President ka KJBWA u bah Generous Warlarpih haba pynlait khubor , u la iathuh ba kine ki lai ngut ki kynthup ia uwei u nongtrei ka KHADC uba shu leh mynleh kum u nongot doh.
“Kine ki ingkhongshalangmat ki kynthup ia u Lorshon Kharbamon, u Paila Pyngrope bad u Nicodamus Majaw uba dei u nongtrei ka KHADC”, la ong u bah Warlarpih.