Tyrha ka jaitbynriew bym shna aiñ khyndew ki MDC

Shillong, 18 Nohprah:
Ka KSU SWKH ka la pynlong ia ka jingialang ia thir jingmut halor ka phang “Ka 6th Schedule:Ka Stieh Jong ka Jaidbynriew”, la pynlong ia katei ka jingialang ha Maharam Higher Secondary School, Mawkyrwat. Ha kajuh ka sngi, la ioh ruh ban pynlong ia ka Maitshaphrang Academic Excellence Award ha kaba la ioh ia ka ban pynshlur ia ki samla ka Ri kiba la jop donburom ha ki kyrdan ba pher ba pher jong ka pule puthi.
U samla Daniel Khyriem president KSU Sengkmie u la long u kongsan, la don ryngkat ruh uSamla Bansharailang Warjri (Organizing Secretary, KSU) bad u Samla Shemphang Lyngdoh Mawphlang (Publicity Secretary, KSU).
Ki Khraw pyrkhat kiba la wan ia shim bynta ha ka jingiathir jingmut ki kynthup ia u Rev.Dr.O.L.Snaitang, Rev.Dr.P.B.M.Basaiawmoit, Tbn.Dr.I.Nongbri bad u Bah Morning Star Sumer , u Samla Forwardman Nongrem, President ka KSU,SWKHD pat u la shim ia ka bynta kum u moderator ka jingiathir jingmut.
Ha katei ka jingiathir la ia kren halor ka jingpynneh-pynsah ia ka riti ka dustur, ka ktien ka thylliej, ka longkynrad halor ka khyndew ka shyiap ne ka synshar- khadar bad ka bishar katkum ki tynrai ka Jaidbynriew.
Nalor kiba bun ki mat ba la iathir,u Dr. Basaiawmoit u la kdew ia ka jingdonkam kyrkieh ban kham pynkhlain ia ka 6th Schedule ha kaba iadei bad ki lai tylli ki Autonomous District Councils ka jylla Meghalaya da kaba pynkylla ia ka Para 12 A jong ka Sixth Schedule.
U Pastor Snaitang, ha ka jingbatai ia ka bor jong ka 6th Schedule ban iada, pynneh pynneh ia ka long kynrad halor ka khyndew ka shyiap , u la pynpaw ia ka tyrha ka Jaidbynriew kaba don ia ki MDC ki bym shym la shna ia ki ain khyndew ki ban tehlakam ia ka jingsyntuid ki jaka puta sha ki kti ki mynder bad kaba la kerkut na shatei bad mihngi ,la ker da ka Assam kaba don 200 lak(antad) ha ka jingbun briew bad na shathie da ka Bangladesh kaba don 2000 lak ngut (antad) ha ka jingbunbriew, katba ka Jaidbynriew jong ngi, ka bym pat don wat tang 14 lak ha ka jingbunbriew, ka donkam kyrkieh ia ki ain khyndew kiba khlain.
Nalor kitei ki symboh pyrkhat la ioh sngew ruh ia ki mat kiba ktah mationg ia ka Jaidbynriew kum ka jingioh rung ki mynder Ri ha ki electoral roll bad ka jingpyniasoh ka bym don nongrim jong ki hima Khasi bad ka Ri India ha u 1947 kiba la pynsngew da u Tbn.Dr. Nongbri bad Bah Sumer.