Jingialang Mahila Congress ha Mawsynram

Shillong, 14 Nohprah:
Da ki hajar ngut ki la tuid sha ka jingialang ba la khot da ka Mawsynram Mahila Block Congress Committee mynta ka sngi kaba la long ha Ritmawsir, hajan PWD road Mawsynram Division. Ia katei ka jingialang la khot da ka kong Jean Lamare President ka Mahila Congress, Mawsynram ha ryngkat ka jingdonlang ka kong Jansi Khar-raswai Vice President bad u President ka MBCC u bah Khelor Kharnaior.
Ha katei ka jingialang ki la pynskhem ban rai da uwei pat u kyrtong na ka seng Congress u ban ia khun ha ka elekshon 2018 hadien ka jingshah beh seng noh jong u bah Pynshngaiñ N Syiem-MLA ba mynta ka Mawsynram. Ki nongkyrshan jong ka seng Congress Mawsynram ki la ong ba la 10 snem mynta ki la trei radbah ban pynjop donburom ia u bah Pynshngaiñ hynrei ka jingtrei shitom jong ki ka shu long lehnohei namarba um shym la trei na ka bynta u paidbah.
“Ka seng Congress kan sei da uwei pat u kyrtong ha ka jaka u bah Pynshngaiñ na bynta u 2018, ngi ngeit skhem ba ka seng Congress kan jied da u briew u ban pylleit jingmut sha u paidbah ym kum u bah Pynshngaiñ uba bun tang ki jingkular hat haduh ba la pynlong ia ki paidbah ka Mawsynram ban im jynjar im kordit namar um don por shuh ban ia kynduh paidbah” ong ki nongialam ka seng Congress-Mawsynram.
“U bah Pynshngaiñ haba u don ha ka seng Congress u ithuh tang ha ka por elekshon hynrei tang shu dep elekshon u la lah klet , um ju pyntip da don jingialang ruh sha ki nongialam jong ka seng” ong ka kong Jean Lamare.