Iaid beit ka jingthep vote ha ki 3 tylli ki konstitwensi ha WKHD

Nongstoiñ, 13 Nohprah:
Ka jingleit thep vote ban jied lai ngut ki nongmihkhmat sha ka Khasi Hills Autonomous District Council (KHADC), ka la kut noh ha ryngkat ka jingiaid beit iaid ryntih khlem kano kano ka jingthut bad la sdang ia ka jingthep vote naduh ka por 7 baje mynstep haduh ka 4 baje janmiet jong kaba la long ha ka sngi ba a r jong ka taiew.
Ka jingwan poi jong ki paidbah ban thep vote na baroh lai tylli ki konstitwensi kiba kynthup ia ka Nongkhlaw-Mairang, Pariong-Mawthadraishan bad Rambrai-Jyrngam kata na ki 146 tylli ki polling station ha kaba la sakhi ruh ia ki kynthei bad ki samla ha ki katto katne ki Polling Station kiba la ieng lain na ka bynta ban leit pyndep ia la ka jong ka hok ban jied ia la u nongmih khmat.
Haba phai sha ka Rambrai-Jyrngam konstitwensi ki don haduh 24581 ki nongthep vote, kata na ki 37 tylli ki Polling station bad ka jingwanpoi jong ki nongthep vote ha katei ka konstitwensi, ka la kot shaduh ka 54% bad ki kyrtong kiba iakhun na katei ka konstitwensi pat ki don haduh saw ngut kiba kynthup ia u World Champion Paliar na ka HSPDP, Kimfa Marbaniang na ka INC, Morningstar Tympuin na ka UDP bad u Denestar Pariong na ka BJP.
Katba ka Pariong-Mawthadraishan konstitwensi kaba don haduh 32230 ki nongthep vote na ki 57 polling station ka jingwanpoi ki nongthep vote ka la kot shaduh ka 66 % bad na kane ka konstitwensi pat ki kyrtong kiba ia aireng ki don haduh san ngut kiba kynthup ia u Ioanis Lyngdoh na ka INC, Thunder Warjri na BJP, Blandingstar Warjri na HSPDP, Pyndapbor Lyngdoh Marshillong na ka KHNAM bad u Jambor Warjri na ka UDP.
Shuh shuh ha Nongkhlaw-Mairang konstitwensi ka jingdon jong ki nongthep vote ka long 34051 na ki 52 tylli ki polling station bad ka jingwan ban poi jong ki nongthep vote ka la kot shaduh ka 67 % katba na kane ka konstitwensi ki kyrtong kiba la ia aireng ki long u bah Councillor Sing Wahlang na ka BJP, Alex Kharsyntiew na ka HSPDP, u Lambok Nongrang na ka Congress bad u Equator Nongrang na ka party UDP.
Na ka liang jong ki bor pyniaid District jong ka West Khasi Hills, ki la buh ruh ia ki nongap pahara ba pyrkhing ha manla ki polling station ryngkat ki rukom pyniaid ba biang na ka bynta ban lait na kino kino ki jingjia shah pynthut ha katei ka jingjied ia ki nongmihkhmat, bad ka jingniew ia ki votes lane ka sngi ban pynbna ia ka result ia ki kyrtong kan long ha ka 16 tarik mynta u bnai