Na ki 33 tang 7 ngut ki ban leit sha District Council

Shillong, 12 Nohprah:
Ki la don haduh 33 ngut ki kyrtong ki ba ia aireng ha kane ka elekshon MDC shiteng samoi ka ban long lashai ka sngi ka 13 tarik u nohprah ha ki 7 tylli ki konstitwensi. Napdeng kitei ki 33 ngut- 29 ngut ki dei ki kyrtong ki ban ia aireng ha ki 6 tylli ki konstitwensi ha KHADC katba 4 ngut pat ka dei na bynta kawei ka konstitwensi ha JHADC.
Lashai ka sngi kan dei ruh ka sngi kaba u paidbah un ai ka rai ba khadduh hangno un nion ia u budam bad iano un ibit ban phah sha kitei ki 7 konstitwensi hadien ba la iohsngew ia ka nongrim bad ka jutang ba ki kyrtong ki la khlei sha u paidbah ha kine ki khyndiat sngi ha ka jingiaid ialap elekshon jong ki.
Hapoh East Khasi Hills ki don 3 tylli ki konstitwensi bad kitei ki kynthup ia ka Nongkrem, ka Laban-Mawprem bad ka Nongspung-Sohiong konstitwensi. Ha Laban-Mawprem ki don 6 ngut ki kyrtong ba kynthup ia u kyrtong ka seng NCP u ba Ricky Shullai, Banrikupar Wahlang ka HSPDP, u bah Bankhraw Kharbuli ka KHNAM, u bah Fedrick Lynshiang ka UDP, u bah Hubert Marbaniang ka BJP bad u bah Allowis Dohtdong u kyrtong shimet.
Ha Sohiong ki don 5 ngut ki kyrtong u bah Nathaniel Rymbai ka Congress, u bah Samlin Malngiang ka HSPDP, u bah Wankupar Syiemlieh ka UDP, u bah Kyntiew Syiemlieh ka BJP bad u bah Prek Mawlong u kyrtong shimet. Ha Nongkrem konstitwensi ki don 5 ngut ki kyrtong u bah H.S Shylla ka UDP, u bah Hubert Riang ka HSPDP, u bah Lambor Nongrum ka Congress, u ba hEdar Lyngdoh Nongbri ka KHNAM bad ka kong Mimi Nongkhlaw ka BJP. Ha West Khasi Hills ki don 13 ngut ki kyrtong bad katei ka kynthup 4 ngut ha Mairang konstitwensi, 5 ngut ha Mawthadraishan konstitwensi bad 4 ngut ha Rambrai konstitwensi. Ha Jaintia hills ki don 4 ngut ki kyrtong.