Paw biang ki kam bamsap ka KHADC, jah sa T.16 lak

Shillong, 12 Nohprah:
Ka KHADC kam pat ioh ia ka ripod jong ka komiti tohkit halor ka jingrung ka pisa jong ka Council sha ki account ki riew shimet hynrei mynta pat la paw biang sa kawei ka kam bamsap hapoh katei ka Council. Ki tyllong khubor ki la iathuh ba mynta ka la jah sa ka pisa kaba dei lyngba ka tnad Forest jong ka KHADC bad katei ka pisa ka kot haduh T.16 lak tyngka.
Hynrei la ong ba ha katei ka jingjia , ka KHADC ka la sospon ia u Forest Guard jong ka da ka jingkynnoh ba dei u Forest Guard uba la pyndonkam bakla ia katei ka pisa kaba T.16 lak tyngka. La ong ba dang khyndiat sngi mynta ka KHADC ka la sospon ia u Forest Guard jong ka, ka tyllong khubor ka la iathuh ba katei ka T.16 lak ka dei ka pisa ba ka Council ka la ioh na ka sorkar ban pynbha bad iada ia ki khlaw ki btap jong ka.
La ong ba la thung kynhun tohkit biang ia katei ka jingjia ha kaba ia katei ka kynhun la khlieh da u bah D.G Syiemiong Joint Secretary ka KHADC bad la bthah ia katei ka kynhun ban wanrah ia ka ripod hapoh ka shibnai.
Katei ka mat ka la kylla kum kawei na ki mat ia kren hapdeng ki MDC bad kumjuh ki nongtrei ka KHADC bad uwei na ki MDC u la ong kumno ka lah ban long ba ka pisa ka Council kan leit sha Forest Guard khlem ka jingtip jong u CEM, ki ophisar lane ka Executive Committee.