U Lat bad ki thup jingrwai Kristmas

Bah RM Shabong
Ngam shym la ioh ia ki Card shah khot sngewbha (imat ba ki la jah lynti), ha shwa ba kin poi ha ki kti jongnga, hynrei nga sngew thikna, ba la khot ianga kum U President jong ka Meghalaya Editors & Publishers Association (MEPA), haba la phone haduh ar sngi kynthih na ophis ka Raj Bhavan, Shillong, ha kaba la pynpaw, ba ka dei ban don lang ha katei ka miet jong ki jing ia rwai Kristmas, ba la pynbeit da U Lat ka Jylla.
Mar ia rung ha khyrdop ka Raj Bhavan, nga la pynsuki ia ka kali jongnga ban leit thoh kyrteng, kumba ju long, hynrei hangtei ruh, ki nongpahara ki shu kaweh beit, kaba pyni kumba ki ong iaid beit shakhmat bad kumta, nga la tur beit beit ban ioh ieng kali, ha ka jaka kaba kham biang.
Ka phyllaw jong ka Raj Bhavan, ka thaba khreh da ki ding kiba la pynriam kum shi bynta jong ka jingrakhe Kristmas bad ha ka lynti iaid, nga ia kynduh ia shibun kiba leit ia shim bynta, kiba dei ki Khasi, ki Mizo, ki Dkhar bad kiwei kiwei ruh.
Mar ia wan U Lat, la sdang ki jingrwai Kristmas, na ki nongrwai bapher, ha kaba kiba bun ki dei ki jingrwai na ki kynhun Balang jong ki Khasi bad don kiba rwai na ka Balang Presbyterian, don kiba rwai na ka Balang U Blei, ka Cathedral Choir jong ka Balang Catholic, don kiba na ka kynhun Mizo, kiba na ka Baptist Church, kawei ka kynhun, kaba na Jowai, kaba rwai ki jingrwai kiba sngewih, kaba ai kyrteng “Last month of the year” bad shibun kiwei kiwei de, kaba la iaid kumba shi kynta shiteng.
Nalor U Lat, uba shong ha la ka jong ka shuki ha pdeng, la don lang ruh U Chief Secretery ka Jylla, U KS Kropha, ka myntri ka sorkar Jylla, ka kong Roshan Warjri myntri ka koit ka khiah bad sa shibun ki riewniam, na ki balang bapher bad kiwei de ki riew rangbah kiba dei na ka kynhun niam Hindu, kiba ia shim bynta lang.
U Lat ha ka jingkren jongu, u ong ba ka por Kristmas, ka dei ba ki briew ki ia pynriam pynbeit ia la ki iing ki sem, hadien ka jingot jongki, ia la ki mar rep mar riang bad nangta, u ong ruh “Ki briew ki ia phong ia ki jain thymmai” bad u da ai nuksa, ba haba u kwah ban phah suhjain, ha kawei ka dukan, u nongsuh u ong “Sir wan hadien ka Kristmas”.
U Lat ha ka jingkren jongu, u khot ruh ia ki paidbah, ba kin niew kor ia ka jingkordor jong ka longbriew manbriew, ha kaba ula ai nuksa, lyngba ka jingshah shitom jong U Jisu Khrist bad u da kyntu ruh ia ki Kristan, ba kin shim ia katei ka phang, kum ka mat kaba kongsan bha.
U Lat u ong shuh shuh ba ka India, ka kiew stet bha ha kine ki sngi, ha ka roi ka par bad u pyni ruh ba ka pyrthei ruh ha kine ki sngi, ka la nang kiew stet shibun ha ka jinglong jingman ka teknoloji.
Hadien katei ka jingiarwai kaba shi kynta shiteng eiei, U Lat, ula khot sngewbha ruh ia baroh sha ka jingiabam ja miet, ha kaba ula ia khublei bad ialam ia ki khynnah rit, ba kin khat ja nyngkong ma ki bad katei ka dei ka jingailad jong une U Lat, na ka bynta ka jinglehkmen Kristmas, kaba la ia shim bynta, da kumba 300ngut eiei ki briew. Na kaei kaba nga kynmaw, kane kaba mynta, ka dei ka jingrakhe Kristmas, kaba ar sien ha ka jinglamkhmat jong une U Lat, uba mynta bad nga shu shim, ba kane ka sien, ka kham heh, na kaba long mynshem snem, wat la ngam shym poi ban ia shim bynta. Ha ka por ba ia bamja, nga kylli, la un leit shuti ne em, ha kane ka Kristmas; ula iathuh ba u mut ban leit jngoh ia ki katto katne ki iingmane ha ki jingiaseng Kristmas bapher bad kata ka dei ka mat jong U Lat bad ki thup jingrwai Kristmas.