Ka HSPDP kam kyrshan ia ki ishu jaitbynriew, ong u kyrtong UDP

Shillong, 9 Nohprah:
U Kyrtong ka UDP na Laban-Mawprem konstitwensi u bah Fedrick Lynshing u la ong ba ka seng HSPDP kam dei ka seng kaba kyrshan ia ka ishu jaitbynriew kaba u CEM ka KHADC u bah Pynshngaiñ N Syiem u don bad u leh mynta hynrei ka UDP pat ka kyrshan ia utei u CEM ka KHADC halor ki ishu jong u. U bah Lynshiang u la ong ba ka HSPDP dei tang ma ka –ka Party marwei hi kaba shong ha ka liang pyrshah ha District Council kaba pyni ba kim kwah ban treilang na bynta ki ishu jong ka jaitbynriew.
Ula kdew ba kawei na ki mat ba ka UDP ka kyrshan ia u ba Pynshngaiñ mynta ka dei halor ka jingpyrshah jong u ia ka jingkyntur pud ka MUDA hynrei u la ong ba ka seng HSPDP pat kala pynlong iaka Rally paidbah ha Madan Malki ban leit tur sha Secretariat ban dawa na ka sorkar jylla ban pyrshah jur iaka jingwan kyntur pud ka MUDA hynrei hadien ba ki nongialam kane ka seng kila iakynduh ia ka Myntri Pynroi Sor kila pdiang noh iaka jingpyntreikam iaka Building Byelaw jong ka MUDA ha ki Scheduled Area ne ha ki jaka kiba hap hapoh ka jingkhmih jong ka District Council.
“Ka HSPDP ka la dawa ha ka iingdorbar thawain ka jylla ba dei ban pyntreikam noh iaka Article 371 jong ka riti synshar ka ri hapoh ka jylla Meghalaya kaba kdew shai ban pynduh noh ia ki District Council hynrei kane kajuh ka seng hi mynta ka pynieng pat ia ki kyrtong ban airing ha ka elekshon MDC Shiteng Samoi bad kane ka pyni ba ka HSPDP kadei ka seng ka bym don nongrim bad ki nongialam kane ka seng kim pat iar ka pyrkhat pyrdain” ong u bah Fedrick.